კოკა ყანდიაშვილი: თამარ კინწურაშვილმა არხი საპენსიო ფონდს დაამსგავსა და “ნაციონალების” აქტივისტების თავშესაფრად აქცია

„აუცილებლად უნდა დაიდოს პროკურატურის დასკვნა – სად წავიდა საზოგადოებრივი მაუწყებლიდან 410 მილიონი?!“ – აცხადებს „საზოგადოებრივი მაუწყებლის“ ყოფილი ჟურნალისტი და გადაცემა „რა ხდება“-ს ავტორი კოკა ყანდიაშვილი გაზეთ „ასავალ-დასავალთან“ ინტერვიუში.
როგორც ყანდიაშვილი გამოცემასთან აცხადებს, „საზოგადოებრივი მაუწყებლის” გაპარტახება “ნაციონალური მოძრაობის” ხელისუფლების დროს, თამარ კინწურაშვილის დროს დაიწყო. მისივე თქმით, თამარ კინწურაშვილმა არხი საპენსიო ფონდს დაამსგავსა და “ნაციონალების აქტივისტების” თავშესაფრად აქცია.
კოკა ყანდიაშვილი ინტერვიუში „საზოგადოებრივი მაუწყებლის“ ბორდის ზოგიერთ წევრს და მედიაექსპერტების აკრიტიკებს.„ვასილ მაღლაფერიძის მიერ წარმოდგენილი სამწლიანი პროგრამა მტკივნეულია, მაგრამ ყველაზე მოკლე გზაა შედეგის მისაღწევად. თუმცა, საინტერესოა, ვისთან ერთად აპირებს მაღლაფერიძე ამ რეფორმის გატარებას? პრესკონფერენციაზე ის ხალხი ეჯდა გვერდით, ვისაც წვლილი მიუძღვის ამ ტელევიზიის გაუბედურებაში. მე რომ რიგითი თანამშრომელი ვიყო, რომელსაც სამსახურის დაკარგვა ემუქრება, აუცილებლად ვკითხავდი გენერალურ დირექტორს: ბატონო ვასილ, პატიოსან, პროფესიონალ კაცს, რომ მიშვებთ სახლში და გვიმრაძე გიზით გვერდით, რომელმაც რეფორმა უნდა ჩაატაროს, ეს ნორმალურია?! ყველამ, ვინც ამ ტელევიზიის განადგურების თანამონაწილეა, საზოგადოებრივი მაუწყებელი უნდა დატოვოს და პროკურატურამ 410 მილიონი ლარის გაფლანგვის ისტორია უნდა შეისწავლოს! აუცილებლად უნდა დაიდოს პროკურატურის დასკვნა – ათი წლის განმავლობაში, სად წავიდა ამდენი ფული?! იცით რამდენია 45 მილიონი? ფოთის ბიუჯეტი 13 მილიონია. ახალციხის – 12 , გორის -10, თელავის -10 და ეს ერთად აღებული აქვს საზოგადოებრივ მაუწყებელს! დღეს მხოლოდ იმ ფრაზას განიხილავენ, სადაც ვასილ მაღლაფერიძე ამბობს – ხალხი უნდა გავუშვათ სახლშიო.. საინტერესოა, ვინ გადაწყვეტს, რომელი გადაცემა უნდა დახუროს და რომელი არა? ეს ხომ დიდი უსამართლობა იქნება?! ვასილ მაღლაფერიძემ ასევე ხაზი გაუსვა, არქივი ციფრული უნდა გახდესო, თუ ეს განხორციელდა, პირიქით, ძეგლი უნდა დავუდგათ მას“, – აცხადებს კოკა ყანდიაშვილი.
ჟურნალისტი ასევე იმ მედიაექსპერტებს აკრიტიკებს, რომლებიც „თვითმარქვია“ ექსპერტები გახდნენ და დღეს სხვადასხვა ტელეარხები მათ კომენტარებს სთხოვენ.
„ დღეს, რომ ნინო დანელია სიტყვის თავისუფლებაზე საუბრობს, იცით ვინ არის? ეს ქალი ისეთივე მედიამკვლევარია, როგორიც მე ექსპერტი მეტალურგიის საკითხებში. უთხრეს, შენ მედია უნდა გააკრიტიკოო და მიშას სიტყვებს ასრულებს. ნინო დანელია არის ადამიანი, რომელმაც 410 მილიონი შეჭამა. ის იყო “საზოგადოებრივი მაუწყებლის” ბორდის წევრი და ერთ-ერთი თანაავტორი ამ ტელევიზიის გაუბედურებისა. ვასილ მაღლაფერიძემ რომ ახსენა „კარმუშკაო“, სწორედ ნინო დანელიას, ნინია კაკაბაძის, ეკა კვესიტაძის, დავით პაიჭაძისნაირი ადამიანებისთვის იყო ეს. მათ დაღუპეს არა მხოლოდ “საზოგადოებრივი მაუწყებელი”, არამედ ზოგადად მედია“, – აცხადებს კოკა ყანდიაშვილი გაზეთ „ასავალ-დასავალთან“ ინტერვიუში.