უსაფრთხოების ზომები მამა გიორგის მიმართ იმდენად დაცულია, რომ დღეს ვერ ვაზიარეთ ზუსტად იმის გამო, რომ უსაფრთხოების ზომები ამას ითვალისწინებს, – ამის შესახებ მეუფე ანდრიამ ე.წ. მატროსოვის ციხეში დეკანოზ გიორგი მამალაძის მონახულების შემდეგ განაცხადა.
მან ციხის ადმინისტრაციას მადლობა გადაუხადა სასულიერო პირის მიმართ გამოჩენილი ყურადღებისთვის.
“დარწმუნებული ვარ, ძალოვანი სტრუქტურები ასეთივე უსაფრთხოების ზომებს მისი ოჯახის მიმართაც გამოიყენებენ, თუ იქნება ამის საჭიროება. დეკანოზ გიორგი მამალაძეს საფრთხე არ ემუქრება, ყველანაირ სამედიცინო მომსახურებას უწევენ. რაც საჭიროა მისი ჯანმრთელობისთვის ყველაფერი მობილიზებულია, – განაცხადა მეუფე ანდრიამ.
კითხვაზე, მისცა თუ არა დეკანოზს კურთხევა, ისაუბროს საქმის დეტალებზე, მეუფემ განაცხადა, რომ “ეს საკითხი არ წყდება კურთხევით” და მნიშვნელოვანია, აღსარების საიდუმლოების მომენტი.
მისივე თქმით, სასულიერო პირის მიმართ მსგავსი ბრალდებები დაუჯერებელია. “მწამს, რომ გამოძიება სრული კეთილსინდისიერებით გამოიკვლევს ამ საქმეს და სიმართლე ითქმება”, – განაცხადა მეუფე ანდრიამ.