აშშ-მა რუსეთს მოსკოვში დაგეგმილი ტერაქტის შესახებ მონაცემები სრულად არ გადასცა, რადგანაც საკუთარი წყაროს გამჟღავნებას მოერიდა. ამის შესახებ The New York Times-ი წერს.
„ამერიკასა და რუსეთს შორის მტრულმა დამოკიდებულებამ არ მისცა საშუალება ვაშინგტონს, მოსკოვისთვის მიეწოდებინა ტერაქტის შესახებ რაიმე სახის დამატებითი ინფორმაცია, გარდა იმ ცნობებისა, რომელთა გაზიარებაც საჭირო იყო.
ეს იმ საფრთხის გათვალისწინებით მოხდა, რომ რუსეთის ხელისუფლებას შეეძლო ამოეცნო წყაროები ან დაზვერვის მეთოდები“, – ნათქვამია სტატიაში.
მოსკოვის ოლქის ქალაქ კრასნოგორსკში Crocus City Hall-ის საკონცერტო დარბაზში შეიარაღებულმა პირებმა ცეცხლი 22 მარტს გახსნეს. თვითმხილველის განცხადებით, ინციდენტი ჯგუფ „პიკნიკის“ კონცერტის დაწყებამდე მოხდა – დარბაზის პარტერში სულ მცირე სამი შეიარაღებული პირი შეიჭრა და ავტომატებიდან ცეცხლი გახსნა. არსებული ინფორმაციით, თავდამსხმელებმა ასევე ააფეთქეს ხელყუმბარა, რის გამოც ხანძარი გაჩნდა.