სამსახურის ძირითად ფუნქციას სამართალდამცავი ორგანოს წარმომადგენლების მიერ ჩადენილი დანაშაულის გამოძიება წარმოადგენს, თუმცა გაზრდილი უფლებამოსილების ფარგლებში პირადი ცხოვრების საიდუმლოების ხელყოფის გამოძიების დატვირთვის მაჩვენებელმა სამსახურის დატვირთვის 35% შეადგინა, – ამის შესახებ სპეციალური საგამოძიებო სამსახურის უფროსის მოადგილე ნათია სონღულაშვილმა „დღის ქრონიკასთან“ განაცხადა.
მისი თქმით, შეიქმნა სპეციალიზებული სამმართველო, რომელიც ამ კატეგორიის დანაშაულებს იძიებს.
„როგორც მოგეხსენებათ სამსახურმა 2023 წლის საქმიანობის შედეგები წარადგინა, სადაც მოცემულია მნიშვნელოვანი ასპექტები – სამსახურში გამოძიების მაღალი ხარისხი, რომელიც უზრუნველყოფილი უნდა იყოს პოლიტიკის დამდგენი დოკუმენტების შემუშავებით და ეფუძნებოდეს ევროპულ სტანდარტებს და სწორედ ამ მიზნით არაერთი პოლიტიკის დამდგენი დოკუმენტი შემუშავდა წამყვანი ევროპული ქვეყნების სამართლებრივი დოკუმენტების ანალიზის საფუძველზე. მეორე მნიშვნელოვანი გარემოება ეს არის გამჭვირვალობა და ანგარიშვალდებულება. ჩვენ ყოველდღიურად ვაწვდით საზოგადოებას ინფორმაციას დაგეგმილი და გადასადგმელი ნაბიჯებისა თუ გამოძიების მიმდინარეობის შესახებ.
სამსახურის ძირითად ფუნქციას სამართალდამცავი ორგანოებს წარმომადგენლების მიერ ჩადენილი დანაშაულის გამოძიება წარმოადგენს, თუმცა გაზრდილი უფლებამოსილების ფარგლებში პირადი ცხოვრების საიდუმლოების გამოძიების დატვირთვის მაჩვენებელმა სამსახურის დატვირთვის 35% შეადგინა. ამ თვალსაზრისით შექმნილია სპეციალიზებული სამმართველო, რომელიც ამ კატეგორიის დანაშაულებს იძიებს. სამსახურმა დაგეგმა არაერთი საინფორმაციო კამპანია, გვქონდა რეგიონებში მოსახლეობასთან შეხვედრები, რომ მიგვეწოდებინა ინფორმაცია, როგორ მოემართათ ამ კატეგორიის დანაშაულზე უფლებების დარღვევის შემთხვევაში სამსახურისთვის, ის რომ არ უნდა დალოდებოდნენ უშუალოდ პირადი ცხოვრების საიდუმლოს ხელყოფის ფაქტებს და პირველი მუქარისთანავე უნდა მოემართათ ჩვენი გამომძიებლებისთვის. სწორედ ამ დაგეგმილმა კამპანიებმა, გვგონია, რომ გაზარდა სამსახურის მიერ წარმოებული გამოძიების მიმართ ნდობა და მოქალაქეების მომართვიანობა ბოლო პერიოდში განსაკუთრებით გაზრდილია“, – განაცხადა სონღულაშვილმა.