ისრაელის თავდაცვითი ძალების სპიკერმა, დანიელ ჰაგარიმ განაცხადა, რომ დამასკოში სარაკეტო დარტყმა განხორციელდა არა ირანის საკონსულოზე, არამედ „ალ-ქუდსის“ ქვედანაყოფის შენობაზე.
„ჩვენი სადაზვერვო მონაცემების თანახმად, ეს არ არის საკონსულო და ეს არ არის საელჩო. ვიმეორებ, ეს არ არის საკონსულო და არ არის საელჩო. ეს არის „ალ-ქუდსის“ ქვედანაყოფის ძალების სამხედრო შენობა“, – აღნიშნა ისრაელის თავდაცვითი ძალების სპიკერმა.
„მე არ ვაპირებ ამ თავდასხმაზე კომენტარის გაკეთებას, მაგრამ მინდა გითხრათ, რომ ბოლო ექვსი თვის განმავლობაში ირანი რეგიონში ესკალაციას უწყობს ხელს. ის მთავარი აქტორია. ირანი არის მთავარი აქტორი, რომელიც სისასტიკეს ახორციელებს ამ რეგიონში თავისი მარიონეტების გამოყენებით ლიბანში, სირიაში, ერაყში, იემენში“, – დასძინა მან.
დამასკოში ირანის საკონსულოზე ისრაელის ავიაციის იერიშს „ისლამური რევოლუციის გუშაგთა კორპუსის“ „ალ-ქუდსის“ ქვედანაყოფის მეთაური, გენერალი მოჰამად რეზა ზაჰედი ემსხვერპლა.
სირიაში ირანის ელჩმა, ჰოსეინ აკბარიმ განაცხადა, რომ ირანის პასუხი სირიის დედაქალაქ დამასკოში ირანის საკონსულოზე სარაკეტო დარტყმაზე მკაცრი იქნება.