ევროინტეგრაციის პროცესი არის შეუქცევადი. მინდა მივმართო საზოგადოებას, ნუ აჰყვებიან პროვოკაციებს, რომელსაც რადიკალური ოპოზიციის წარმომადგენლები აჟღერებენ, – ამის შესახებ საკრებულოს თავმჯდომარის მოადგილემ, ზურაბ აბაშიძემ გადაცემა „დღის ქრონიკაში“ განაცხადა.
მისივე თქმით, ბოლო პერიოდის მოვლენებმა ნათლად აჩვენა და საზოგადოებას დაანახა, თუ რა ამოძრავებს კოლექტიური „ნაციონალური მოძრაობის“ წარმომადგენლებსა და მათთან დაკავშირებულ პარტიებს.
„გზავნილების მოსმენა საზოგადოებისთვის ადვილად აღსაქმელი არ არის, მაგრამ ჩვენ გვახსოვს, იგივე პარტნიორების მხრიდან სხვადასხვა ტიპის მოწოდება, რომელიც არც თუ ისე შორეულ წარსულში იყო. სააკაშვილი, ყოფილი პრეზიდენტი არის უმძიმესი ავადმყოფი და მისი გაშვება არის აუცილებელი. სხვა შემთხვევაში მოხდება ქვეყნის იზოლაცია, არავითარ შემთხვევაში არ მოხდება კანდიდატის სტატუსის მინიჭება და ასე შემდე, თუმცა ეს ყველაფერი განხორციელდა. პარტნიორებმა დაინახეს, რომ სააკაშვილი არ იყო ავად, ის მხოლოდ და მხოლოდ სიმულირებდა. შემდეგ ეს პროცესი შეუქცევადი გახდა და მივიღეთ ის, რაც მივიღეთ“, – აღნიშნა აბაშიძემ.
მისივე თქმით, სწორედ „ქართული ოცნების“ ხელისუფლების პირობებში მიიღო ქვეყანამ ასოცირების ხელშეკრულება, უვიზო მიმოსვლა, ევროპული პერსპექტივა და შემდეგ კანდიდატის სტატუსი.
„ევროინტეგრაციის პროცესი არის შეუქცევადი. მინდა მივმართო საზოგადოებას, ნუ აჰყვებიან ამ პროვოკაციებს, რომელსაც რადიკალური ოპოზიციის წარმომადგენლები აჟღერებენ. ბუნებრივია, მათ ინფორმაციაზე დაყრდნობით მიეწოდება გარე ძალებს ინფორმაცია. ჩვენ უახლოეს დღეებში დავინახავთ, რომ პროცესები დადებითისკენ შეიცვლება. მოლაპარაკებები არის აუცილებელი, უნდა დამშვიდდეს ქვეყანა და არჩევნებამდე მშვიდობიანად მივიდეს, რათა ჩვენმა მოქალაქეებმა სწორი გადაწყვეტილებები მიიღონ“, – განაცხადა აბაშიძემ.