მათი [ოპოზიციის] თქმით, შარშან მივდიოდით მოსკოვისკენ და ასე მოსკოვისკენ სიარულით აღმოვჩნდით ევროპაში, კანდიდატის სტატუსით, – ამის შესახებ მამუკა მდინარაძემ „ქრონიკასთან“ განაცხადა. „ქართული ოცნების“ აღმასრულებელმა მდივანმა და საპარლამენტო უმრავლესობის ლიდერმა აღნიშნა, რომ სლოგანებით გადაწყვეტილებების მიღება დამღუპველია.
„ყველაზე საშიში შედეგი მაშინ შეიძლება [მივიღოთ], თუ ხელისუფლება მართლა მყარად არ დადგა თავის ადგილას, როდესაც ვიღაცები მოინდომებენ ქვეყნის შიგნიდან თუ გარედან სლოგანებით მართონ მასის ემოცია. სლოგანებით გადაწყვეტილების მიღება არის დამღუპველი, ეს ყველა მოქალაქემ უნდა იცოდეს. არ ამართლებს ადამიანს [ის რომ] ახალგაზრდაა, რაღაც არ წაუკითხავს, ხანში შესულია, არ შეუძლია წაიკითხოს რაღაც – არავის ამართლებს სლოგანის დონეზე რაღაცების დაჯერება ან არ დაჯერება“, – განაცხადა მდინარაძემ.
მისივე თქმით, გამჭვირვალობის კანონში ათასჯერ მეტი მსგავსებაა ამერიკულ ანალოგთან, ვიდრე რუსულთან და ამერიკული და რუსული კანონები მეტად ჰგავს ერთმანეთს, ვიდრე რომელიმე მათგანი ქართულს, რომელიც არცერთ შეზღუდვას არ ითვალისწინებს.