არავის მიეცემა საშუალება ძირი გამოუთხაროს საზოგადოების უსაფრთხოებას, საკუთარ ქვეყანას, თავს დაესხას ინსტიტუტებს, პოლიციელებს,- ამის შესახებ პარლამენტის თავმჯდომარის მოადგილემ არჩილ თალაკვაძემ „დღის ქრონიკაში“ განაცხადა.
მისივე თქმით, რადიკალური ოპოზიცია ცდილობს მოქალაქეების ემოციები სათავისოდ, ხელისუფლებაში დასაბრუნებლად გამოიყენოს.
„ჩვენ პატივს ვცემთ თითოეულ ჩვენს თანამოქალაქეს, ვისაც აქვს გულწრფელი კითხვები ან კრიტიკულ პოზიციას გამოხატავს და ყველაფერს ვაკეთებთ და გავაკეთებთ მომავალშიც, რომ გამოხატვის მანიფესტაციის, შეკრების უფლება მშვიდობიან ფარგლებში, როგორც ეს კანონით და ევროსტანდარტებით არის დადგენილი, იყოს დაცული. თუმცა აქვე მინდა ვთქვა, რომ არავის მიეცემა საშუალება ძირი გამოუთხაროს საზოგადოების უსაფრთხოებას, საკუთარ ქვეყანას, თავს დაესხას ინსტიტუტებს, პოლიციელებს. აქ ძალიან მკაფიო ზღვარია გავლებული და მომავალშიც ასე იქნება“,- განაცხადა თალაკვაძემ
მანვე ისაუბრა ოპოზიციის ლიდერების გეგმებზეც.
„გამჭვირვალობა ვერ იქნება ანტიევროპული. ვხედავთ, რომ რადიკალური ოპოზიცია, რომელიც იყო ადრე ხელისუფლებაში, ცდილობს და ელოდება, რომ როგორმე ახალგაზრდების პროტესტი, მოქალაქეების ემოციები გამოიყენოს იმისთვის, რომ არჩევნების გვერდის ავლით სცადოს ხელისუფლებაში დაბრუნება. ეს ყველაფერი სწორედ ამიტომ ხდება, რადიკალური ჯგუფები, რომლებსაც გარეთაც ჰყავთ ლობისტები და ეხმარებიან რესურსებით, განცხადებებით, ცდილობენ საზოგადოების ემოციები გამოიყენონ და როგორმე დაბრუნდნენ ხელისუფლებაში ძალადობრივი გზით, დესტაბილიზაციით. იმიტომ, რომ მათ არ აქვთ დემოკრატიული არჩევნებში მოგების, შედეგის იმედი. ჩათვალეთ, რომ ამაზე მუშაობენ ისინი დღე და ღამე. მათი მართული მედიებით, ექსპერტებით და იმ რესურსებით, რომელიც ჩართულია“ ,- აღნიშნა თალაკვაძემ.