სუვერენიტეტისა და ტერიტორიული მთლიანობის პრინციპის პატივისცემა, ტაივანის სუვერენიტეტის საკითხი, ჭარბი წარმოება და სი ძინპინის ვიზიტი ევროპაში – ამ საკითხებზე ისაუბრა ჩინეთის სახალხო რესპუბლიკის ელჩმა საქართველოში მედიისთვის გამართულ პრესკონფერენციაზე.
ჭოუ ციენმა კიდევ ერთხელ გაუსვა ხაზი, რომ ჩინეთი მხარს უჭერს საქართველოს ტერიტორიულ მთლიანობასა და სუვერენიტეტს. ელჩმა ისაუბრა საქართველო-ჩინეთის სტრატეგიულ ურთიერთობასა და ორ ქვეყანას შორის უვიზო მიმოსვლაზე, რომელიც თვის ბოლოს ამოქმედდება.
ჭოუ ციენის განცხადებით, ეს გადაწყვეტილება ხელს შეუწყობს უახლოეს მომავალში ორ ქვეყანას შორის პირდაპირი ავიარეისების დამატებას.
„ჩინეთი, როგორც პასუხისმგებელი დიდი ქვეყანა და გაეროს უშიშროების საბჭოს მუდმივი წევრი, ყოველთვის პატივს ცემს ყველა სახელმწიფოს, მათ შორის, საქართველოს სუვერენიტეტსა და ტერიტორიულ მთლიანობას. ჩინეთი განუხრელად იცავს გაეროს წესდებებს, მიზნებსა და პრინციპებს. მას შემდეგ, რაც გასულ წელს, ჩინეთსა და საქართველოს შორის სტრატეგიული პარტნიორობა დამყარდა, ორ ქვეყანას შორის პოლიტიკური ნდობა და სტრატეგიული თანამშრომლობები კიდევ უფრო გაიზარდა. ჩემი და ჩემი ქართველი კოლეგების ერთობლივი ძალისხმევით ჩინეთ-საქართველოს შორის უვიზო შეთანხმება თვის ბოლოს ოფიციალურად ამოქმედდება. სავარაუდოა, რომ უახლოეს მომავალში ორმხრივი ფრენები გახშირდება. ჩინური კომპანიების მიერ ბოლო დროს განხორციელებული პროექტები საქართველოს ეკონომიკურ და სოციალურ განვითარებას ხელს შეუწყობს. ჩინეთი მზადაა ქართულ მხარესთან ერთად კიდევ უფრო გაამდიდროს სტრატეგიული პარტნიორობის შინაარსი ამ ორი უძველესი ცივილიზაციისთვის კეთილდღეობისა და აღორძინებისთვის ახალ ეპოქაში“,- აღნიშნა ჭოუ ციენმა.