აშშ-ის სახელმწიფო დეპარტამენტის ოფიციალურმა წარმომადგენელმა, მეთიუ მილერმა განაცხადა, რომ ირანის პრეზიდენტის ვერტმფრენის ჩამოვარდნის შემდეგ ირანმა ვაშინგტონს დახმარება სთხოვა. ინფორმაციას ამის შესახებ ფრანგული გამოცემა Le Figaro ავრცელებს.
„ირანის მთავრობამ დახმარება გვთხოვა“, – განუცხადა ჟურნალისტებს სახელმწიფო დეპარტამენტის სპიკერმა, მეთიუ მილერმა.
„ჩვენ განვუცხადეთ, რომ მზად ვიქნებით დასახმარებლად, რასაც გავაკეთებდით ნებისმიერი ხელისუფლებისთვის ამ სიტუაციაში. საბოლოო ჯამში, პირველ რიგში, ლოგისტიკური მიზეზების გამო, ჩვენ ვერ შევძელით ამ დახმარების გაწევა“, – აღნიშნა მეთიუ მილერმა.
ვერტმფრენი, რომლის ბორტზეც ირანის პრეზიდენტის იბრაჰიმ რაისი და საგარეო საქმეთა მინისტრი ჰოსეინ ამირ აბდოლახიანი იმყოფებოდნენ 19 მაისს ჩამოვარდა, როცა ირანის დელეგაცია აზერბაიჯანიდან ბრუნდებოდა. ჩამოვარდნილი ვერტმფრენი 20 მაისის დილას აღმოაჩინეს. ბორტზე მყოფი ყველა ადამიანი დაიღუპა.