გერმანიის საგარეო საქმეთა მინისტრი ანალენა ბერბოკი კიევში ჩავიდა. რუსეთის უკრაინაში სრულმასშტაბიანი შეჭრის დაწყების შემდეგ ეს გერმანიის საგარეო საქმეთა მინისტრის რიგით მეშვიდე ვიზიტია კიევში.
უსაფრთხოების მიზნით, ვიზიტის შესახებ წინასწარი ინფორმაცია არ გავრცელებულა.
„რუსული რაკეტებისა და უპილოტო საფრენი აპარატებისგან უკრაინის დასაცავად ქვეყანას სასწრაფოდ სჭირდება მეტი საჰაერო თავდაცვა. ჩვენ ახლა უნდა გავაერთიანოთ ძალები, რათა უკრაინა გადარჩეს და პუტინის ჯარები მალე არ აღმოჩნდნენ ჩვენს საზღვრებთან“, – განაცხადა ბერბოკმა კიევში ვიზიტისას.
ბერბოკის თქმით, გლობალურმა საჰაერო თავდაცვის ინიციატივამ, რომელიც მან თავდაცვის მინისტრთან, ბორის პისტორიუსთან ერთად წამოიწყო, თითქმის მილიარდი ევრო შეაგროვა უკრაინის საჰაერო თავდაცვის ძალების დამატებითი მხარდაჭერისთვის.
„ჩვენ ინტენსიურად ვმუშაობთ, რომ ეს თანხა კიდევ უფრო გაიზარდოს. ყველა დეტალს გულდასმით ვსწავლობთ და წინ წავიწიეთ „პეტრიოტის“ კომპლექსების დამატების კუთხით“, – განაცხადა ბერბოკმა.
ცნობისთვის, გერმანიის მთავრობამ 17 აპრილს წამოიწყო ინიციატივა დამატებითი საჰაერო თავდაცვის საშუალებების მოძიებაზე, რომლებიც უკრაინას უნდა გადაეცეს.