თუ ვინმეს ჰგონია, რომ საქართველო არის დაბალი ღობე და აქ გაუვათ „მუსკულების“ დემონსტრირება, ეს ასე ნამდვილად არ იქნება,- ამის შესახებ ადამიანის უფლებათა დაცვისა და სამოქალაქო ინტეგრაციის საპარლამენტო კომიტეტის თავმჯდომარე რატი იონათამიშვილმა განაცხადა.
მისივე თქმით, რომელიმე კანონმდებლის დასანქცირება საკუთარი პროფესიული საქმიანობის შესრულების გამო მიუღებელია.
„ელემენტარული თავმოყვარეობა მოითხოვს იმის აღნიშვნას, რომ პასუხს და საყვედურს ვერ სცემენ თურქეთს, საფრანგეთს, მთლიანად ევროკავშირს და თუ ვინმეს ჰგონია, რომ საქართველო არის დაბალი ღობე და აქ გაუვათ „მუსკულების“ დემონსტრირება, ეს ასე ნამდვილად არ იქნება. ჩვენ ვართ ამაყი ხალხი და ის, რომ ან კანონმდებელი, ან ნებისმიერი, საკუთარი პროფესიული საქმიანობის შესრულებისთვის, იქნეს შეზღუდვის მექანიზმის ქვეშ, ეს კატეგორიულად მიუღებელია და ვერაფერი ხელს ვერ შეგვიშლის იმაში, რომ ჩვენ ჩვენი ქვეყნის სამსახურში ვიყოთ და მივიღოთ ის გადაწყვეტილებები, რაც ამ ქვეყნის სუვერენიტეტის განმტკიცებას, მეტ დამოუკიდებლობას შეუწყობს ხელს“,- აღნიშნა იონათამიშვილმა.