საქართველოს დამოუკიდებლობის დღისადმი მიძღვნილი საზეიმო ღონისძიებების ფარგლებში, დედაქალაქსა და 18 ქალაქში სამხედრო ტექნიკის, შეიარაღებისა და აღჭურვილობის გამოფენა მოეწყობა.
გორში, ღონისძიების მასპინძელი შინაგან საქმეთა სამინისტრო და „საქართველოს ფოსტა“ იქნება. დღის განმავლობაში ქალაქში სხვადასხვა აქტივობაა დაგეგმილი.
საზეიმო ღონისძიებისთვის სამზადისი უკვე დაწყებულია. დილიდან დაკეტილია გორის ცენტრალური მოედანი. ადგილზე განთავსებულია შსს-ის სასაზღვრო პოლიციის ახალი ვერტმფრენიც.
მოქალაქეები ხვალ მთელი დღის განმავლობაში შეძლებენ გაეცნონ შინაგან საქმეთა სამინისტროსა და საქართველოს ფოსტის საქმიანობას. ქალაქის ცენტრში განთავსდება საგამოფენო და ინტერაქციული სტენდი. დაგეგმილია ადგილობრივი მეწარმეების პროდუქციის გამოფენა- გაყიდვაც.
გაიმართება შემეცნებითი და გასართობი აქტივობები. მთელი დღის განმავლობაში გორში შეკრებილი საზოგადოების განწყობაზე ადგილობრივი ანსამბლები იზრუნებენ, ხოლო 17:10 საათზე, საქართველოს დამოუკიდებლობის გამოცხადების ისტორიულ დროს გორის ქალთა კაპელა საქართველოს ჰიმნს შეასრულებს.