კიევსა და მის დასავლელ მხარდამჭერებს, მათ შორის აშშ-ს შორის, მკვეთრი უთანხმოება ჩნდება უკრაინის თავდაცვის მომავალთან დაკავშირებით, – წერს ამერიკული გაზეთი The Washington Post-ი.
„უკრაინელი ლიდერები სულ უფრო ხშირად გამოთქვამენ უკმაყოფილებას, რომ ვაშინგტონი ზღუდავს მათ შესაძლებლობას უპასუხონ რუსეთის თავდასხმებს მაშინ, როდესაც ამერიკელი პოლიტიკოსები მათ უბიძგებენ მეტი გააკეთონ კორუფციასთან საბრძოლველად თუნდაც გაუარესებული ომის ფონზე. ამასობაში, ევროპელი და ამერიკელი ოფიციალური პირები კამათობენ სტრატეგიაზე, რომელიც ბრძოლის ველზე ვითარების შემოტრიალებას შესაძლებელს გახდის“, – წერს გაზეთი The Washington Post-ი.
სტატიაში აღნიშნულია, რომ პოლიტიკოსებმა ვაშინგტონში, კიევსა და ევროპაში განაცხადეს, რომ დაძაბულობა ბოლო კვირების განმავლობაში გაძლიერდა, რადგან რუსეთმა ფრონტის ხაზზე ინიციატივა აიღო ხელში.
ყველაზე მწვავე უთანხმოება ამ დროისთვის უკავშირდება უკრაინის შესაძლებლობას, გამოიყენოს დასავლეთისგან მიღებული შეიარაღება რუსეთის ტერიტორიაზე სამიზნეების წინააღმდეგ. ბაიდენის ადმინისტრაციამ მკაცრად აუკრძალა უკრაინას ამისთვის აშშ-ის იარაღის გამოყენება.
აშშ და უამრავი ევროპული ქვეყანა ასევე დაყოფილია ისეთ საკითხებზე, როგორიცაა უკრაინის ნატოში გაწევრიანების გზა და გაყინული რუსული აქტივების კიევისთვის დახმარების დასაფინანსებლად გამოყენება.
„კიევში დიპლომატებმა და სხვა ოფიციალურმა პირებმა აღნიშნეს, რომ პრეზიდენტმა თანამდებობიდან გადააყენა უკრაინელი მაღალჩინოსნები, რომლებიც ბოლო კვირების განმავლობაში ვაშინგტონთან ყველაზე ახლოს მყოფებად ითვლებოდნენ.
ამერიკელი ოფიციალური პირები ამტკიცებენ, რომ ურთიერთობების ძირითადი ასპექტები ძლიერი რჩება, რაც მიუთითებს ღრმა სამუშაო ურთიერთობაზე ვაშინგტონსა და კიევს შორის, რომელიც მოიცავს აშშ-ის სამხედრო დახმარებას.