მინდა ვკითხო საზოგადოებას, რა განსხვავებაა ამ ქართველთმოძულე მიხაელ როთსა და იმ რუს ეგზარქოსს, პავლეს შორის, რომელმაც ჯერ კიდევ მე-19 საუკუნის ბოლოს ქართველი ერი ამბიონიდან დაწყევლა და შეურაცხყოფა მიაყენა ჩვენს კულტურას?!, – ამის შესახებ საზოგადოება „ქართულის“ დამფუძნებელმა გიორგი გაბუნიამ „იმედის კვირას“ განუცხადა.
მან კომენტარი გააკეთა გერმანიის პარლამენტის საგარეო ურთიერთობათა კომიტეტის თავმჯდომარის, მიხაელ როთის განცხადებაზე.
„ფაქტია, რომ ეს ადამიანი გამოხატავს აშკარა უპატივცემულობასა და უდიერ დამოკიდებულებას ჩვენი სარწმუნოების, ჩვენი ეკლესიის და ზოგადად, ჩვენი კულტურისა და ისტორიის მიმართ, რაც კატეგორიულად მიუღებელი და დაუშვებელია.
მინდა ვკითხო საზოგადოებას, რა განსხვავებაა ამ ქართველთმოძულე მიხაელ როთსა და იმ რუს ეგზარქოსს, პავლეს შორის, რომელმაც ჯერ კიდევ მე-19 საუკუნის ბოლოს ქართველი ერი ამბიონიდან დაწყევლა და შეურაცხყოფა მიაყენა ჩვენს კულტურას, ჩვენს ისტორიას?! მინდა გითხრათ, რომ არანაირი განსხვავება არ არსებობს“, – აღნიშნა გაბუნიამ.
გერმანიის პარლამენტის საგარეო ურთიერთობათა კომიტეტის თავმჯდომარემ, მიხაელ როთმა სოციალურ ქსელში დაწერა: „ყველა ეკლესია, რელიგია და მათი მრევლი ვალდებულები არიან, გაუძლონ კრიტიკას. ზოგიერთს ამასთან დაკავშირებით ჯერ კიდევ პრობლემები აქვს – ჩემს შემთხვევაში ეს ქართული მართლმადიდებლობაა, ისევე როგორც ისლამი“.