პირველ ივნისს, დაახლოებით 09:00 საათზე, პარიზში, ეიფელის კოშკთან ხუთი კუბო იპოვეს. თითოეულ მათგანს საფრანგეთის დროშა ეფარა წარწერით: “უკრაინის ფრანგი ჯარისკაცები“ – დაზვერვის წარმომადგენლები თვლიან, რომ ამ “ტრიუკის” მიღმა რუსეთი დგას.
პოლიციამ იმ ფურგონის მძღოლი დააკავა, რომლითაც პარიზის მთავარ სიმბოლოსთან კუბოები მიიტანეს. მძღოლი ამტკიცებს, რომ კუბოების ადგილზე მისატანად 40 ევრო გადაუხადეს. კიდევ ორი პირი ბერსის ავტოსადგურზე დააკავეს. პოლიციის თქმით, მძღოლი ბულგარელი იყო, დანარჩენი ორი კი უკრაინელი და გერმანელი. საქმეზე დაწყებულია გამოძიება.
გასულ თვეში მოსკოვი ნეგატიურად შეხვდა პრეზიდენტ ემანუელ მაკრონის გადაწყვეტილებას უკრაინაში ჯარისკაცების გაგზავნის შესახებ. უკრაინელმა ოფიციალურმა პირებმა დაადასტურეს, რომ დისკუსიები გაიმართა ფრანგი სამხედრო ინსტრუქტორების გაგზავნასთან დაკავშირებით.
ოქტომბერში – ისრაელ-პალესტინის კონფლიქტის დაწყების შემდეგ – პარიზში რამდენიმე კედელზე დავითის ვარსკვლავი გამოსახეს. საქმეზე პოლიციამ მოლდოველი ცოლ-ქმარი დააკავა, რომლებიც, სავარაუდოდ, რუსული დაზვერვისგან იღებდნენ თანხას. გასულ თვეში აქტივისტებმა ჰოლოკოსტის მემორიალზე წითელი ხელები დახატეს. პოლიციის განცხადებით, დამნაშავეები საზღვარგარეთ გაიქცნენ.