კვლევების თანახმად, მშვიდობა ევროპის ყველა ქვეყნისთვის მნიშვნელოვანია, თუმცა გამოკითხვებში ეს საკითხი გერმანიაში, ბალტიის ქვეყნებში, პოლონეთში ლიდერობს – ისეთ ქვეყნებში, რომელთაც რუსეთისგან პირდაპირი საფრთხის განცდა აქვთ, – ამის შესახებ საქართველოსა და ევროკავშირს შორის პარტნიორობისა და თანამშრომლობის პირველი ქართული დელეგაციის წევრმა, ფსიქოლოგმა, რუსუდან გორგილაძემ „დღის ქრონიკაში“ განაცხადა.
გერმანიიდან ჩართვისას მან ისაუბრა ევროპარლამენტის მომავალ არჩევნებთან დაკავშირებით, კერძოდ, შეაფასა, თუ როგორია ამ დროისთვის არსებული სურათი.
„ნამდვილად, ეს ძალიან მნიშვნელოვანი არჩევნებია მიმდინარე უკრაინის ომის ფონზე და იმ დიდი კონფლიქტის ფონზე, რომელიც არის ახლო აღმოსავლეთში. რასაკვირველია, ეს რაღაცნაირად ცვლის იმ აქცენტებს, იმას, რაც აინტერესებს ევროპელს. გამოკვლევების თანახმად, პირველ რიგში, ევროპელს აინტერესებს მშვიდობა და უსაფრთხოება, რომელიც მას ათეული წლების განმავლობაში ჰქონდა, რომელსაც მიეჩვია, აფასებს და ძალიან უნდა, რომ ასე გაგრძელდეს. ის, რაც ახლა ხდება, ნამდვილად უქმნის საფრთხეს მშვიდობას. ამიტომ, გერმანული გამოკვლევებით, მაგალითად, მშვიდობა პირველ ადგილზე გადმოვიდა. ადრე იყო კლიმატის ცვლილებისა და გარემოს დაცვის საკითხები. ახლა მან მეოთხე ადგილზე გადაინაცვლა და პირველ ადგილზეა მშვიდობა.
გერმანიას ევროპარლამენტში ყველაზე მეტი წარმომადგენელი ჰყავს – 96, ეს არის მაქსიმუმი, რომელიც ქვეყანას შეიძლება ჰყავდეს და ყველაზე მინიმუმი ჰყავს, ლუქსემბურგსა და მალტას. ეს არის 6.
კვლევები თანხმდებიან მშვიდობა ევროპის ყველა ქვეყნისთვის არის მნიშვნელოვანი, თუმცა გამოკითხვებში ეს საკითხი ლიდერობს გერმანიაში, ბალტიის ქვეყნებში, პოლონეთში. ისეთ ქვეყნებში, რომელთაც აქვთ განცდა, პირდაპირი საფრთხე შეიძლება შეექმნათ რუსეთიდან და ასე შემდეგ. პრინციპში, მშვიდობა არის ყველასთვის მნიშვნელოვანი, რადგან ეს საფუძვლად უდევს ადამიანის ყოველდღიურ ცხოვრებას. ევროპაში მართალია, ქვეყნებს შორის ეს საკითხი ძალიან განსხვავებული იყო, მაგრამ გარკვეული პირადი კეთილდღეობა არსებობდა და ფასების ასეთმა არანორმალურმა ზრდამ, რომელიც პირდაპირ არის ამ ომთან დაკავშირებული, საფრთხე შეუქმნა, ასევე -უკონტროლო მიგრაციამ. ეს ის საკითხებია, რომელიც ევროპაში ძალიან აინტერესებთ“, – განაცხადა გორგილაძემ.
ევროპის 27 სახელმწიფო ახალი მოწვევის პარლამენტს ირჩევს. არჩევნები სხვადასხვა ქვეყანაში 6-9 ივნისს ჩატარდება. ხმის მიცემის უფლება დაახლოებით, 350 მლნ ადამიანს აქვს. მათ 2024 წლის მოწვევის ევროპარლამენტში 720 დეპუტატი უნდა აირჩიონ.