იაპონიის პრემიერ-მინისტრი ფუმიო კიშიდა სექტემბერში ლიბერალურ-დემოკრატიული პარტიის თავმჯდომარის პოსტზე კენჭს აღარ იყრის და მთავრობის მეთაურის თანამდებობას დატოვებს. ინფორმაციას ამის შესახებ Reuters-ი ავრცელებს.
„პოლიტიკა საზოგადოების ნდობის გარეშე ვერ იფუნქციონირებს. მე, როგორც პარტიის რიგითი წევრი, ახლად არჩეულ ლიდერს მხარდაჭერას გამოვუცხადებ“, – თქვა მან ტოკიოში გამართულ პრეს-კონფერენციაზე.
კიშიდას რეიტინგი სერიოზულად დაზარალდა მას შემდეგ, რაც მისი პარტიისა და გაერთიანების ეკლესიის კავშირები გამოაშკარავდა. ეკლესია პარტიას ფულს სწირავდა, თუმცა შემოწირულებების აღრიცხვა არ ხდებოდა.
სააგენტოს მტკიცებით, გარდა ამისა, იაპონიის მოსახლეობა კიშიდას მთავრობას ბრალს სდებს იმაში, რომ ხელფასები ფასების ზრდას არ ეწევა. ეს ხდება მაშინ, როცა ქვეყანამ რამდენიმე წლიანი დეფლაციური წნეხი დაძლია.
კიშიდა იაპონიის პრემიერ-მინისტრად 2021 წლის 4 ოქტომბერს დაინიშნა.