დღეს დილიდან განახლებულ აღმაშენებლის გამზირზე ვიზალიბერალიზაციის აღსანიშნავი ღონისძიებები მიმდინარეობს. ამ დღის აღსანიშნავად, 12:00 საათიდან ქართველი DJ-ები მოსიკალურად აფორმებენ ღონისძიებებს.
როგორც ელექტრონული, ასევე კლასიკური მუსიკის მოსმენა “ევროპულ ქუჩაზე” გასულ მოქალაქეებს ღამის 00:00 საათამდე შეეძლებათ.
აღმაშენებლის გამზირის საფეხმავლო მონაკვეთი დეკორაციებით, ევროკავშირისა და საქართველოს დროშებითა და სიმბოლიკებითაა გაფორმებული. ბავშვებისთვის მოწყობილია გასართობი ზონები. ქუჩის ერთ მონაკვეთზე აგრარული უნივერსიტეტის კულინარიის აკადემიის სტუდენტები და შეფ-მზარეულები საგანგებოდ მოწყობილი დახლებიდან სტუმრებს ქართული და ევროპული სამზარეულოს კერძებით უმასპინძლდებიან. წარმოდგენილია ლობიანი, ხაჭაპური, ავსტრიული შნიცელი, გერმანული ჰოთ-დოგები, იტალიური სენდვიჩები, ფრანგული ეკლერები და სხვ. ასევე გამოფენილია, ქართული ტრადიციული მეთოდებით დამზადებული სხვადასხვა სახეობის ქართული ღვინოები.
აღმაშენებლის გამზირზე 15:00 საათიდან, სახალხო პროექტი, „გვიდირიჟორე“ დაიწყება, ასევე, გაიმართება თოჯინური ოპერა ”სევილიელი დალაქი”. 18:00 საათზე, ქართული ჯგუფი The Black Marrows დაუკრავს, დღის ბოლოს კი კონცერტი გაიმართება, რომელზეც ყველასთვის ცნობილი ევროპული მუსიკა აჟღერდება.