ანგელა მერკელი – გირჩევთ რეგიონებში, სოფლებში დასახლდეთ, სადაც ნაკლები ხალხია

გერმანიის კანცლერმა ანგელა მერკელმა გერმანიაში მყოფ დევნილებს მოუწოდა, დიდი ქალაქების ნაცვლად სოფლებში დასახლდნენ. აღნიშნულის შესახებ ანგელა მერკელმა ყოველკვირეულ მიმართვაში განაცხადა.
„ბევრი ამბობს, რომ დიდ ქალაქებში სურთ ცხოვრება, მაგრამ დიდ ქალაქებში პრობლემებია საცხოვრებელთან დაკავშირებით. ამიტომაც მე გირჩევთ რეგიონებში, სოფლებში დასახლდეთ, სადაც ნაკლები ხალხია“, – განაცხადა ანგელა მერკელმა.
მისი თქმით, საიმიგრაციო კრიზისის დაწყებიდან გერმანიამ მილიონამდე დევნილი მიიღო. ხელისუფლება საცხოვრებელით პირველ რიგში მათ უზრუნველყოფს, ვინც გერმანიაში დარჩენის უფლება მიიღო.
„დევნილები აქ ჩამოვიდნენ, რადგან მშვიდი და უსაფრთხო ცხოვრების პოვნა სურდათ. ამიტომაც მათ პატივი უნდა სცენ და მიიღონ ღირებულებები, რომლითაც ეს ქვეყანა ცხოვრობს. ეს არის ტოლერანტობა, გახსნილობა, აღმსარებლობისა და აზრის თავისუფლება“, – განმარტა გერმანიის კანცლერმა.
მერკელმა ასევე მოუწოდა გერმანელებს, „უფრო ღია იყვნენ დევნილებთან მიმართებაში“.
„ჩვენ ძალიან ცოტა რამ ვიცით სირიაზე, ერაყზე, ჩრდილოეთ აფრიკის ქვეყნებზე და ეს შესაძლებლობა უნდა გამოვიყენოთ, რათა ისინი უკეთ გავიცნოთ, მათგან რაღაც ვისწავლოთ“, – დასძინა მან.