ცხოველის ფეკალიებით ქალაქის დაბინძურებისთვის ჯარიმა 50 ლარი იქნება, სიგარეტის ნამწვის დაყრისთვის კი 80 ლარი

დღეიდან, შპს “თბილსერვის ჯგუფის” ინსპექტორები თბილისის ქუჩებსა და სკვერებში სისუფთავეს გააკონტროლებენ და გარემოს დამბინძურებლებს ფულად ჯარიმას დააკისრებენ.
როგორც “თბილსერვისში” აცხადებენ, გარემოს დანაგვიანება ისჯება კანონით და განისაზღვრება ჯარიმების შემდეგი ოდენობით:
2 კგ-მდე მუნიციპალური ნარჩენით გარემოს დანაგვიანება – 80 ლარით, იგივე ქმედება ჩადენილი შენობა-ნაგებობიდან – 100 ლარით; (ორ კილიგრამამდე საყოფაცხოვრებო ნარჩენის კატეგორიაში შედის სიგარეტის ნამწვიც). 2 კგ-ზე მეტი მუნიციპალური ნარჩენით გარემოს დანაგვიანება – 150 ლარით, იგივე ქმედება ჩადენილი შენობა-ნაგებობიდან – 500 ლარით.
გარემოს საყოფაცხოვრებო ნარჩენებით დაბინძურების გარდა, კანონით ასევე, იკრძალება ტერიტორიის შინაური ცხოველების ფეკალური მასებით დაბინძურებაც, თუმცა პასუხისმგებლობა არ დაეკისრება მეპატრონეს, თუ იგი დაუყონებლივ და სრულად მოასუფთავებს დაბინძურებულ ადგილს, წინააღმდეგ შემთხვევაში, იგი 50 ლარით დაჯარიმდება.
გარდა ამისა, იკრძალება დედაქალაქის ავტომობილის საბურავებითა და სახიფათო ნარჩენებით დაბინძურება. ხუთ ერთეულამდე საბურავით გარემოს დანაგვიანებისთვის, ველოსიპედის საბურავის გარდა, ჯარიმა 150 ლარით, ხუთი ერთეული, ან ხუთ ერთეულზე მეტი საბურავით გარემოს დანაგვიანება, ველოსიპედის საბურავის გარდა – 500 ლარით განისაზღვრება.
მკაცრი სანქციები იმოქმედებს გარემოს სახიფათო ნარჩენებით დანაგვიანების შემთხვევაში. როგორც “თბილსერვის ჯგუფში” განმარტავენ, მსგავსი ნარჩენების კონტეინერის გარეშე გადაყრის შემთხვევაში, ფიზიკური პირი – 400 ლარით, ხოლო იურიდიული პირი -1000 ლარით დაჯარიმდება.
“შპს „თბილსერვის ჯგუფი“, ნარჩენების მართვის კოდექსის შესაბამისად, უფლებამოსილია, შეადგინოს საჯარიმო ოქმი”, -აცხადებენ “თბილსერვისში”.