„ეს არის ძალიან დიდი სიყალბე და ტყუილი. ჩვენ არაერთხელ გამოვიჭირეთ კონკრეტული არასამათავრობო ორგანიზაციები ტყუილში, როდესაც ამ ტიპის განცხადებებს აკეთებდნენ, თუმცა როდესაც საქმე საქმეზე მივიდა, მათ არანაირი კონკრეტული მტკიცებულება და ფაქტები არ გააჩნდათ“, – განაცხადა დედაქალაქის მერმა კახა კალაძემ მედიასთან ოპოზიციის წარმომადგენელთა იმ ბრალდების საპასუხოდ, რომლის მიხედვითაც „ქართული ოცნება“ წინასაარჩევნოდ ყალბ პირადობებს ამზადებს და ე.წ. კარუსელისთვის ემზადება.
კახა კალაძის თქმით, აღნიშნული ბრეალდებების უკან მდგომი რადიკალების მიზანი მშვიდობიანი არჩევნებისთვის ხელის შეშლაა.
„ესეც მიმართულია იქითკენ, რომ მცდელობა აქვთ, როგორმე ეს მშვიდობიანი არჩევნები გააფუჭონ, დააზიანონ. იმიტომ არიან რადიკალები და ქვეყნის მტრები, რომ ამ ადამიანებს არ მოსწონთ და არც სურთ ეს მშვიდი ვითარება, არ მოსწონთ ქვეყანაში მშვიდობა. წარმოიდგინეთ, როცა ბანერებზე პირდაპირ არის გამოკრული – „არა ომს“ და ვებრძვით, ვეწინააღმდეგებით იმას, რომ ქვეყანაში არ იყოს მეორე ფრონტი, არ იყოს ომი, მათ ესეც აწუხებთ და ესეც მძიმეა მათთვის და ხედავთ, რას აკეთებენ. გადახაზეს და გადაღებეს აღნიშნული ბანერები, სადაც ეწერა – „არა ომს“. წარმოგიდგენიათ ამ ადამიანების განწყობა, რა მდგომარეობაში იმყოფებიან ისინი. შესაბამისად, ყველა უნდა მივიდეთ 26 ოქტომბერს არჩევნებზე და გავაკეთოთ სწორი არჩევანი, რომელიც სჭირდება ამ ქვეყანას და მის მომავალს. ქვეყანაში მნიშვნელოვანია მშვიდობა და მშვიდობის შენარჩუნება. მშვიდობას არ აქვს ალტერნატივა. ჩვენ ქვეყანაში მშვიდობა რომ არ გვქონოდა, დღეს აქ არ ვიქნებოდით და ამ მნიშვნელოვანი პროექტის სანახავად ვერ მოვიდოდით. შესაბამისად, ყველაზე მნიშვნელოვანი არის მშვიდობის შენარჩუნება“, – განაცხადა კახა კალაძემ.