წერილს წერენ ადამიანები, რომელთაც სამშობლო არ გააჩნიათ. ეს წერილი სავსეა სიცრუით, რომ არჩევნებზე 120 ათასი დარღვევა მოხდა, – განაცხადა რადიკალური ოპოზიციის მიერ ბრიუსელში გაგზავნილ წერილზე საუბრისას პარლამენტის პირველმა ვიცე-სპიკერმა, გიორგი ვოლსკიმ.
„წერილს წერენ ადამიანები, რომელთაც სამშობლო არ გააჩნიათ. ეს წერილი სავსეა სიცრუით, რომ არჩევნებზე 120 ათასი დარღვევა მოხდა; რომ 200 თუ 300 ათასი ხმა გაყალბდა და ამიტომ საქართველოს უნდა დაუწესდეს სანქციები და მის მიმართ ზომები უნდა გატარდეს, სანამ ეს ხელისუფლება არ დაინგრევა, არ ჩამოიშლება და არ მოვა ის ადამიანი, იმ ადამიანთა ჯგუფი, რომლებმაც ადრე ქვეყნის მმართველობით თავი გამოიჩინეს და სისხლიანი ხელებით არიან“, – განაცხადა ვოლსკიმ.
რადიკალური ოპოზიციის მიერ ბრიუსელში გაგზავნილი ანტისახელმწიფოებრივი წერილის შემდეგ ჯოზეფ ბორელი საქართველოში პოლიტიკურ მისიას გამოგზავნის, რომელიც არჩევნებთან დაკავშირებულ მდგომარეობას შეისწავლის. ამის შესახებ საგარეო პოლიტიკისა და უსაფრთხოების საკითხებში ევროკავშირის უმაღლესმა წარმომადგენელმა ევროკავშირის საგარეო საქმეთა მინისტერიალის შეხვედრის შემდეგ განაცხადა.