აშშ-ს მოქმედი პრეზიდენტის ჯო ბაიდენის ადმინისტრაცია აპირებს დაამტკიცოს პაკეტი, რომელიც ითვალისწინებს 680 მილიონი დოლარის ღირებულების იარაღის მიყიდვას ისრაელისთვის, მიუხედავად იმისა, რომ ძალაში შევიდა დაჯგუფება „ჰეზბოლასა“ და ისრაელს შორის ამერიკისა და საფრანგეთის შუამავლობით დადებული ცეცხლის შეწყვეტის შეთანხმება, – იუწყება Reuters-ი.
პაკეტში შედის ათასობით GPS-ით მართვადი პირდაპირი დარტყმის ბომბები (JDAM) და ასობით მცირე ზომის ბომბები.
ინფორმაცია ამის შესახებ გავრცელდა ცეცხლის შეწყვეტის შეთანხმების ამოქმედებიდან ერთი დღის შემდეგ, თუმცა ისრაელი განაგრძობს ბრძოლას დაჯგუფება „ჰამასთან“ ღაზას სექტორში.
მსგავსი პაკეტი ისრაელმა აგვისტოშიც მიიღო. მაშინ მან 20 მილიარდი დოლარის სამხედრო ტექნიკა შეისყიდა.
ვაშინგტონი ითვლება ისრაელის ყველაზე მსხვილ მოკავშირედ და იარაღის მიმწოდებლად. აშშ-მ 2023 წლის ოქტომბრიდან, როდესაც ღაზას სექტორში ომი დაიწყო, ისრაელში 10 000-ზე მეტი ბომბი და ათასობით რაკეტა Hellfire გაგზავნა.