პარლამენტში სუს-ის ანგარიშის მოსმენა დაიხურა საპარლამენტო უმცირესობა კომიტეტების გაერთიანებული სხდომის დახურვას აპროტესტებს. პარლამენტის ადამიანის უფლებათა დაცვის, იურიდიულ საკითხთა და თავდაცვისა და უშიშროების კომიტეტების გაერთიანებულ სხდომაზე სახელმწიფო უსაფრთხოების სამსახურის უფროსის მოადგილე ალექსანდრე ტაბატაძემ სუს-ის მიერ გაწეული საქმიანობის ზოგადი ანგარიში ღია ფორმატში, მედიის თანდასწრებით წარმოადგინა, თუმცა ამ ანგარიშის წარმოდგენის შემდეგ კომიტეტების ხელმძღვანელებმა კოლეგებს სხდომის დახურვა შესთავაზეს.
როგორც ირაკლი სესიაშვილმა განაცხადა, დეპუტატებს აქვთ კითხვები, რაც თავისი შინაარსით სახელმწიფო საიდუმლოების შემცველია და ამიტომ, კომიტეტის თავმჯდომარემ გაერთიანებული სხდომის დახურვის მიზანშეწონილობას გაუსვა ხაზი.
ამ შეთავაზებას ოპოზიციონერი დეპუტატების უკმაყოფილება მოჰყვა. მათი საპასუხო შეთავაზება იყო, რომ ღია ფორმატში დასმულიყო ის კითხვები, რომელიც აქვთ სუს-თან და რომელიც თავისი შინაარსით საიდუმლოებას არ შეიცავს, ხოლო დახურულიყო საკუთრივ ის ნაწილი, რაც სახელმწიფო საიდუმლოებასთან დაკავშირებულ საკითხებს უკავშირდება. ამ თემამ კომიტეტების გაერთიანებულ სხდომაზე მცირე კამათი გამოიწვია. საბოლოოდ, ჩატარდა კენჭისყრა და კომიტეტების წევრებმა ხმათა უმრავლესობით სხდომის დახურვის გადაწყვეტილება მიიღეს.
ამ წუთებში, სამი კომიტეტის გაერთიანებულ სხდომაზე 5-წუთიანი ტექნიკური შესვენება გამოცხადდა, რის შემდეგაც ალექსანდრე ტაბატაძესთან შეხვედრა დახურულ ფორმატშიი, კითხვა-პასუხის რეჟიმში წარიმართება.
