“ოპოზიციის ლიდერების განეიტრალებით აქციაზე სიმშვიდემ დაისადგურა. ფაქტობრივად, დადასტურდა, რომ გასული დღეების განმავლობაში ძალადობის ესკალაციას აქციაში მონაწილე რადიკალი ჯგუფები ახდენდნენ და არა სამართალდამცველის უწყების წარმომადგენლები”, – ამის შესახებ ანალიტიკოსი, დავით ჩიხელიძე სოციალურ ქსელში წერს.
ის შინაგან საქმეთა სამინისტროს პროფესიონალიზმს მადლობას უხდის.
“მადლობა შსს-ს რომელმაც კიდევ ერთხელ გამოავლინა მაღალი პროფესიონალიზმი და ყველა იმ ადამიანის განეიტრალება (დაკავება) მოახდინა, რომლებიც პოლიციაზე შტურმის ორგანიზებას ახდენდნენ, რა თქმა უნდა პოლიციაზე ძალადობა არ იყო სპონტანური აქტი, ეს იყო ოპოზიციის ოფისებში წინასწარ, კარგად დაგეგმილი პროცესი, რასაც გუშინ მათი ოფისებიდან ამოღებული კანონსაწინააღმდეგო ნივთების მრავალფეროვნება და რაოდენობა ადასტურებს. სწორედ ოპოზიციური პარტიების ოფისებიდან ამოიღეს ე.წ. მოლოტოვის კოქტეილები, პიროტექნიკა, საღებავები და ა.შ.
ვისურვებდი ყველა დამნაშავის უმკაცრეს დასჯას, რადგან სახელმწიფოს წინააღმდეგ ამბოხი დაუსჯელი არ უნდა დარჩეს, პოლიტიკური პარტიების ოფისებში არა მოლოტოვის კოქტეილი არამედ საქართველოს განვითარების გეგმა უნდა მზადდებოდეს და ახალგაზრდებს სამშობლოს სიყვარულს ასწავლიდნენ. მაგრამ ჩვენი ოპოზიცია, ტერორისტულ ორგანიზაციად გარდაიქმნა, რომლისთვისაც ცნება სამშობლო უბრალოდ არ არსებობს”, – წერს ჩიხელიძე.