დაცვის მხარემ სასამართლოს სხდომაზე აღიარა დანაშაული, რომ ალექსანდრე ელისაშვილი ნამდვილად დაესხა თავს დაზარალებულს, – განაცხადა პროკურორმა ზვიად გუბელაძემ სასამართლო სხდომის დასრულების შემდგომ.
„სამჯერ მოაშორეს ბრალდებული დაზარალებულს, სამივეჯერ დაბრუნდა და მიაყენა მას ფიზიკური შეურაცხყოფა ხელებით და ფეხებით. ეს არის ის, ვიდეო-ჩანაწერში რაც ჩანს“, – აღნიშნა პროკურორმა.
„ძლიერი საქართველოს“ ერთ-ერთ ლიდერს, ალეკო ელისაშვილს თბილისის საქალაქო სასამართლომ აღკვეთის ღონისძიების სახით პატიმრობა შეუფარდა.
ალეკო ელისაშვილი 4 დეკემბერს, სასტუმრო „ქორტიარდ მარიოტთან“ დააკავეს.
საგამოძიებო უწყების ცნობით, შინაგან საქმეთა სამინისტროს მიერ ჩატარებული გამოძიებით დადგინდა, რომ 2 დეკემბერს თბილისში, კოსტავას ქუჩაზე მდებარე ერთ-ერთ აფთიაქთან ალექსანდრე ელისაშვილი „აზერბაიჯანელთა ეროვნული კონგრესის“ თავმჯდომარეს, ალი ბაბაევს თავს დაესხა და სიტყვიერი, ფიზიკური შეურაცხყოფა მიაყენა. უწყების ცნობით, მას ბრალი ედება სისხლის სამართლის კოდექსის 156-ე მუხლის მე-2 ნაწილის „ა“ ქვეპუნქტით გათვალისწინებული დანაშაულისთვის, რაც გულისხმობს ძალადობის გამოყენებით ჩადენილ დევნას.