კალინ ჯორჯესკუ რუმინეთის საკონსტიტუციო სასამართლოს გადაწყვეტილებას სახელმწიფო გადატრიალებას უწოდებს.
მისივე თქმით, რუმინეთში კანონის უზენაესობა კომაშია, მართლმსაჯულება კი პოლიტიკურ დაკვეთებს ექვემდებარება და პრაქტიკულად დაკარგა თავისი არსი.
„რუმინელი ხალხი დღეს თავის უფლებებს ითხოვს. ხმის მიცემა დემოკრატიის სიმბოლოა, რადგან სიმართლის ირგვლივ გაერთიანებული ჩვენ უფრო ძლიერები ვართ, ვიდრე ოდესმე. დროა, ვაჩვენოთ, რომ ჩვენ ვართ მამაცი ხალხი და რუმინელი ერის ბედი და უფლებები ჩვენს ხელშია. ჩვენი დემოკრატია საფრთხის ქვეშაა. პრაქტიკულად ამ დღეს რუმინეთის კორუმპირებულმა სისტემამ თავისი ნამდვილი სახე გამოავლინა, კერძოდ, ეშმაკთან შეთანხმება დადო.
მე, კალინ ჯორჯესკუს, მხოლოდ ერთი შეთანხმება მაქვს რუმინელ ხალხთან და ღმერთთან. პირველ ტურში კენჭისყრით ჩვენ გამოვავლინეთ კორუმპირებული და მაფიოზური სისტემა და ვიპოვეთ ძალა, როგორც ხალხმა. დღეს ჩვენ უფრო მეტად ვაცნობიერებთ ძალას, რომელიც დევს თითოეულ ჩვენგანში, ინდივიდუალურად და ერთობლივად. დღევანდელი დღე მხოლოდ ახალი ფურცლის დასაწყისია ამ ქვეყნის ისტორიაში. ღირსეული ადამიანების, ერთიანი ადამიანების, ლამაზი, ძლიერი და მამაცი ადამიანების მიერ დაწერილი გვერდი. გამარჯვება ღმერთს ეკუთვნის და ჩვენ ვართ მხოლოდ საშუალება, რომლითაც მისი ნება სრულდება“, – განაცხადა კალინ ჯორჯესკუმ.
ცნობისთვის, გამოცემა „პოლიტიკომ“ გაავრცელა ინფორმაცია, რომ რუმინეთის საკონსტიტუციო სასამართლომ საპრეზიდენტო არჩევნების პირველი ტურის შედეგები რუსეთის გავლენის შიშის გამო გააუქმა.