მაია რჩეულიშვილს, შესაძლოა, დღესაც მისცენ სასჯელაღსრულების დაწესებულების დატოვების უფლება, ან მხოლოდ მეუღლის დაკრძალვის დღეს გამოუშვან მცირე ხნით, ამის შესახებ საზოგადოებრივს რჩეულიშვილების ოჯახის ადვოკატმა მარიამ ცუცქირიძემ განუცხადა.
მისი თქმით, სასჯელაღსრულების სამინისტროს ოფიციალური წერილით 13 აპრილს საღამოს მიმართეს და თავიდანვე ჰქონდათ ინფორმაცია, რომ უქმე დღეების გამო სამინისტროდან ოფიციალურ წერილს ვერ მიიღებდნენ. თუმცა როგორც მარიამ ცუცქირიძე ამბობს, მათ დაპირდნენ, რომ მოთხოვნას აუცილებლად დაუკმაყოფილებდნენ.
რჩეულიშვილების ოჯახის ადვოკატმა საზოგადოებრივს განუცხადა, რომ ვახტანგ რჩეულიშვილს ხვალ, 16 აპრილს დაკრძალავენ.
ვახტანგ რჩეულიშვილი, 63 წლის ასაკში, ავადმყოფობის შედეგად 13 აპრილს გარდაიცვალა.
მაია რჩეულიშვილს თბილისის საქალაქო სასამართლომ 31 მარტს 4 წლით თავისუფლების აღკვეთა მიუსაჯა. ამავე საქმეზე 4-წლიანი პატიმრობა მის დას, რუსუდან კერვალიშვილსაც შეეფარდა.
„ცენტრ პოინტის“ დამფუძნებლებს მაია რჩეულიშვილსა და რუსუდან კერვალიშვილს, ბრალი ედებათ თაღლითობასა და თანხების მითვისებაში. გამოძიების ინფორმაციით, მაია რჩეულიშვილმა და რუსუდან კერვალიშვილმა ამხანაგობა”თაბუკაშვილი 88″-ის კუთვნილი 11 მილიონზე მეტი ლარი მიითვისეს.