არჩევნები მოიპარეს, ეს არის წმინდაწყლის პოლიტიკური კეკლუცობა და ამას სერიოზულად არავინ უყურებს. თუნდაც გუშინდელი ვიზიტი ამ საკითხთან დაკავშირებით ერთმნიშვნელოვნად ასრულებს ყველანაირ სპეკულაციას, – განაცხადა „დღის ქრონიკასთან“ საუბრისას ფრაქცია „ქართული ოცნების“ წევრმა გიორგი გაბუნიამ, ევროსაბჭოს გენერალური მდივნის ალენ ბერსეს ვიზიტთან დაკავშირებით.
მისი თქმით, ალენ ბერსეს ვიზიტი მნიშვნელოვანია და მან მიიღო ყველა საჭირო ინფორმაცია მიმდინარე მოვლენებთან დაკავშირებით.
„ერთმნიშვნელოვნად უნდა ითქვას, რომ ბატონი გენერალური მდივნის ვიზიტი საქართველო არის პოზიტიური და იქნება პროდუქტიული“, – განაცხადა გიორგი გაბუნიამ.
ის ასევე გამოეხმაურა ოპოზიციის ერთი ნაწილის პროტესტს, რომელიც ევროსაბჭოს გენერალურ მდივანთან შეხვედრაზე უარს შეეხებოდა. მისი თქმით, რადიკალები იყვნენ სწორედ ისინი, ვინც ცდილობდნენ საქართველოში ჩატარებულ არჩევნებთან დაკავშირებით, არასწორი ინფორმაცია მიეწოდებინათ დასავლელი პარტნიორებისთვის.
„საქართველოში ჩატარებული არჩევნები და მისი ლეგიტიმაცია არასდროს არ იდგა და არ დადგება კითხვის ნიშნის ქვეშ. საქართველოში არჩევნები ჩატარდა მშვიდ, დემოკრატიულ, კონკურენტულ გარემოში და ამასთან დაკავშირებით კითხვები არ არსებობს. სწორედ ისინი [ოპოზიცია] ცდილობდნენ, რომ მიეწოდებინათ ინფორმაცია ჩვენი დასავლელი პარტნიორებისთვის, რომ თითქოს საქართველოში არჩევნები გაყალბდა, მაგრამ როდესაც ვერანაირი მტკიცებულება ვერ იქნა წარმოდგენილი, როდესაც დაიწყო მოკვლევა ამ საკითხის მოკვლევა საქართველოში და მათ შორის სასამართლოში იქნენ დაბარებული დაკითხვაზე, ვერანაირი მტკიცებულება ვერ იქნა მათი მხრიდან წარდგენილი. შემდეგ, უკვე დაიწყეს საუბარი არა არჩევნების გაყალბებაზე, არამედ იმაზე, რომ „ქართულმა ოცნებამ“ არჩევნები მოიპარა. მათ შორის ჩვენ ვნახეთ ასეთი განცხადება სალომე ზურაბიშვილის მხრიდან გუშინ ევროპარლამენტში.
არჩევნები მოიპარეს, ეს არის წმინდაწყლის პოლიტიკური კეკლუცობა და ამას სერიოზულად არავინ უყურებს. თუნდაც გუშინდელი ვიზიტი ამ საკითხთან დაკავშირებით ერთმნიშვნელოვნად ასრულებს ყველანაირ სპეკულაციას, იმასთან დაკავშირებით, რომ საქართველოში არჩევნებთან დაკავშირებით რაიმე კითხვის ნიშანი არსებობდა“, განაცხადა გიორგი გაბუნიამ.