ევროსაბჭოს გენერალური მდივნის საქართველოში ვიზიტს რაც შეეხება, ზოგადად, კომუნიკაცია მნიშვნელოვანია. ჩვენ ყოველთვის ღია ვართ და არასდროს დაგვიხურავს კარი ვინმესთვის, პირიქით, ყოველთვის ვამბობთ, რომ ჯანსაღი ურთიერთობები და არსებული ვითარების გაჯანსაღება არის ძალიან მნიშვნელოვანი, – ამის შესახებ დედაქალაქის მერმა, კახა კალაძემ მედიასთან განაცხადა, როდესაც მას ევროსაბჭოს გენერალური მდივნის ალენ ბერსეს საქართველოში ვიზიტთან დაკავშირებით ჰკითხეს.
კახა კალაძე ევროსაბჭოს გენერალური მდივნის მიერ „უცხოური გავლენის გამჭვირვალობის შესახებ“ კანონში ცვლილებების შესაძლო შეტანასთან დაკავშირებით განცხადებას გამოეხმაურა და აღნიშნულ კანონზე დისკუსიისა და მასში ცვლილებების შეტანის მიმართულებით თანამშრომლობის მზადყოფნა გამოხატა.
„რაც შეეხება გამჭვირვალობის კანონს, ჩვენ რამდენჯერ გვითქვამს და კიდევ გავიმეორებ, ვინმე გამოჩნდეს, რომელიც იტყვის, რა არის აღნიშნულ კანონმდებლობაში პრობლემა. მაშინაც ვიძახდით და ახლაც იმავეს ვიმეორებთ – გამოთქვით კონკრეტული მოსაზრებები და მიუთითეთ, თუ რა არის პრობლემა აღნიშნულ კანონმდებლობასთან დაკავშირებით, რა ეწინააღმდეგება ევროპულ მომავალს და რას შეუქმნის აღნიშნული კანონი საფრთხეს. ჩვენ არანაირი პასუხი ამაზე არ მიგვიღია და დღესაც პასუხი არ არსებობს. უბრალოდ, მოიფიქრეს რაღაც პიარული სისულელე, რომ ეს არის რაღაც რუსული კანონი. არადა ნახეთ საფრანგეთმა ამაზე მძიმე კანონი მიიღო. იმაზეც მზად ვართ, რომ ანალოგიური გადმოვიტანოთ, რაც საფრანგეთმა მიიღო და რომელიც გაცილებით მძიმეა, ვიდრე ჩვენი მიღებული გამჭვირვალობის კანონი. ასე რომ, თუკი რაიმე არსებობს, კონკრეტული, თუ რა შეიძლება, შეიცვალოს, მზად ვართ თანამშრომლობისთვის, ოღონდ ვინმემ თქვას. ამასთან დაკაკვშირებით არც ჩვენ, არც საზოგადოებას არ მოუსმენია არგუმენტი. ერთადერთი პასუხი ჰქონდა სალომე ზურაბიშვილს – იმიტომ. მეტი არაფერი მოგვისმენია“, – განაცხადა კახა კალაძემ.
ევროპის საბჭოს გენერალურმა მდივანმა ალენ ბერსემ თბილისში გამართულ პრეკონფერენციაზე განაცხადა, რომ „მთავრობამ გასცა დაპირება, რომ შეცვლიდა უცხოური გავლენის შესახებ კანონის შინაარსს, შეიქმნება სამუშაო ჯგუფი და მოხდება იდენტიფიცირება ცვლილებების, რომლებიც უნდა განხორციელდეს“.