ეკონომიკის სამინისტროს საზღვაო ტრანსპორტის სააგენტო შავ ზღვაში სატვირთო გემის ჩაძირვასთან დაკავშირებით განცხადებას ავრცელებს.
სააგენტოს ცნობით, ეკიპაჟის რამდენიმე წევრი უგზო-უკვლოდაა დაკარგული. სამაშველო ოპერაციას რუსეთის საგანგებო სიტუაციების სამინისტრო აწარმოებს, ჩართულია 13 ერთეული მცურავი საშუალება. სააგენტოს განცხადებით, ნოვოროსიისკის სამაშველო სამსახურმა დაადასტურა, რომ ეკიპაჟის ერთი წევრი, უკრაინის მოქალაქე გადაარჩინეს, ხოლო ეკიპაჟის დანარჩენ წევრებს ეძებენ.
“გემი 2017 წლის 4 აპრილს იმყოფებოდა საქართველოში, კერძოდ, ფოთის ნავსადგურში და მისი ტექნიკური გამართულობა ეჭვს არ იწვევდა. გემი თურქული კომპანიის საკუთრებაა,” – აცხადებს საზღვაო ტრანსპორტის სააგენტო.
დღეს დილით, 3;30 საათზე შავ ზღვაში, ქერჩის სრუტესთან პანამის დროშის ქვეშ მცურავი სატვირთო გემი “Герои Арсенала” ჩაიძირა. «Интерфакс»-ის ცნობით, გემზე ეკიპაჟის 12 წევრი იმყოფებოდა, მათგან 5-ის გადარჩენა მოხერხდა, დანარჩენებს კი ამ დრომდე ეძებენ. რუსული ეკიპაჟის წევრებიდან 9 რუსეთის მოქალაქეა, 2 უკრაინელი და 1 საქართველოს მოქალაქე. ხორბლით დატვირთული გემი რუსეთის როსტოვის ოლქიდან თურქეთში მიემგზავრებოდა.