ქალბატონი პია კაუმას ვიზიტის გადადება კიდევ ერთხელ მიუთითებს იმაზე, თუ რა ძალები ებრძვიან დღეს ჩვენს სახელმწიფოს, რა ძალებს არ უნდათ მშვიდობა და სტაბილურობა ჩვენს ქვეყანაში. რა თქმა უნდა, ვიზიტის გადადება ამ შემთხვევაში ცუდი პრეცედენტია, რადგან აღმოჩნდა, რომ ქალბატონმა პიამ ვერ გაუძლო იმ ზეწოლას, რომელიც არა მხოლოდ საქართველოდან, არამედ, სხვა ქვეყნებიდან და მათ შორის ევროპარლამენტარებისგან გაკეთდა, – განაცხადა საპარლამენტო უმრავლესობის წევრმა, ვლადიმერ ბოჟაძემ ჟურნალისტებთან საუბრისას.
ბოჟაძის განცხადებით, რა თქმა უნდა ვიზიტის გადადება არის ცუდი, მაგრამ გაცილებით ცუდია ომი, არასტაბილურობა, საქართველოს უკრაინიზაცია, დაკარგული ტერიტორიები და ის უბედურება, რაც შეიძლება ქვეყანაში სახელმწიფო გადატრიალებამ მოიტანოს.
„ეს კიდევ ერთხელ მიუთითებს, რომ ჩვენს ქვეყანაში არსებობენ ძალები, რომლებსაც არ უნდათ, არ უხარიათ ჩვენი ქვეყნის წარმატება, პირველ რიგში ეს არის სწორედ რადიკალური ოპოზიცია. შეფასებისათვის, შეგვიძლია ვთქვათ, რომ ვიზიტის გადადება არის ცუდი, თუმცა გაცილებით ცუდია ომი, არასტაბილურობა, ჩვენი ქვეყნის უკრაინიზაცია, დაკარგული ტერიტორიები და ის უბედურება, რაც შეიძლება ჩვენს ქვეყანაში სახელმწიფო გადატრიალებამ მოიტანოს. ვიზიტის გადადება მიუთითებს მათ შორის იმაზე, რომ თავად ოპოზიცია, სამოქალაქო სექტორი და მედია არ აღმოჩნდა მასთან სალაპარაკოდ მზად, რადგან იცით თქვენ, რომ იგივე ეუთოს დასკვნაში შავით თეთრზე წერია, რომ არჩევნები იყო კონკურენტუნარიანი ჩვენ თავის დროზე მოვისმინეთ საპარლამენტო დელეგაციის განცხადებები, შეფასებები, რომლებიც 27 ოქტომბერს გაკეთდა, შეფასებები, რომლებიც მას შემდეგ გაკეთდა და მთავარი ვიზიტის ამოცანა იყო ის, რომ ჩვენ უკვე დაგვეწყო მუშაობა ოპოზიციასთან, სამოქალაქო სექტორთან ერთად, იმ შენიშვნებსა და რეკომენდაციებზე, რომლებიც ჰქონდა ეუთოს და რა თქმა უნდა, ამისათვის მზაობის არ არსებობა კიდევ ერთხელ მიუთითებს, რომ ოპოზიციისთვის მთავარი არ არის არჩევნები, მთავარია ხელისუფლებაში მოვიდნენ და რაც ყველაზე მთავარია სამწუხაროდ, არჩევნების გარეშე, რადგან ახალი არჩევნები მათ მოუტანს არა გამარჯვებას, არამედ კიდევ ერთ შანსს რევოლუციისა, არ შემდგარი რევოლუციისა რომელიც არ და ვერ შედგა 26 ოქტომბრის არჩევნების შემდეგ,“- განაცხადა ვლადიმერ ბოჟაძემ.