გერმანიის კანცლერი ოლაფ შოლცი უკრაინისთვის იარაღის მიწოდების ზრდის წინააღმდეგია, თუ ეს მოითხოვს ბიუჯეტის სხვა პუნქტების შემცირებას. ამის შესახებ მან ქალაქ ბილეფელდში წინასაარჩევნო ღონისძიების დროს განაცხადა.
„მე წინააღმდეგი ვარ, რომ ეს თანხები პენსიებიდან ავიღოთ. მე წინააღმდეგი ვარ, რომ ეს გავაკეთოთ ადგილობრივი ბიუჯეტების შემცირების გზით. მე წინააღმდეგი ვარ, რომ ნაკლები თანხა ჩავდოთ სარკინიგზო და საავტომობილო გზებში“, – აღნიშნა გერმანიის კანცლერმა.
თუმცა შოლცი აცხადებს, რომ პარლამენტში არ არის უმრავლესობა, რომელიც მხარს დაუჭერდა გერმანიაში სახელმწიფო სესხების მკაცრი შეზღუდვების, ე.წ. ვალის მუხრუჭის შეჩერებას უკრაინისთვის დახმარების დასაფინანსებლად.
გასულ კვირას „შპიგელმა“ გაავრცელა ინფორმაცია, რომლის თანახმადაც, საგარეო საქმეთა მინისტრი ანალენა ბერბოკი და თავდაცვის მინისტრი ბორის პისტორიუსი არჩევნებამდე უკრაინისთვის სამი მილიარდი ევროს ღირებულების იარაღის მიწოდებას ითხოვდნენ, მაგრამ შოლცმა ეს წინადადება დაბლოკა.
„თუ თქვენ ამას აკეთებთ, ასევე უნდა თქვათ, საიდან მოდის ფული“, – განაცხადა შოლცმა.
გერმანიის თავდაცვის მინისტრმა, ბორის პისტორიუსმა უარყო მედიის ინფორმაცია იმის შესახებ, რომ შოლცი თითქოს ბლოკავს უკრაინისთვის სამი მილიარდი ევროს ღირებულების დამატებით სამხედრო დახმარების პაკეტს, თუმცა აღიარა, რომ გადაწყვეტილება ჯერ არ არის მიღებული.