უკრაინის შეიარაღებულმა ძალებმა გვიან ღამე დრონებით რუსეთში, ქალაქ ყაზანში მდებარე ქიმიური საწარმო დაბომბა. ინფორმაციას უკრაინული მედია ავრცელებს.
შეტევა განხორციელდა ქარხანაზე „ყაზან ორგსინთეზი“. საწარმო ჯგუფ „სიბურის“ შემადგენლობაში შედის. როგორც უკრაინული მედია ირწმუნება, ეს არის რუსეთში ერთადერთი ქარხანა, რომელიც მაღალი სიმკვრივის პლასტიკს აწარმოებს. ეს აგრეთვე არის რუსეთის ერთ-ერთი უმსხვილესი ქარხანა, რომელიც მაღალი და საშუალო სიმკვრივის მქონე პოლიეთილენს ამზადებს.
„ტელეგრამში“ სხვადასხვა ჯგუფები ქარხანაში დრონების შეტევის შედეგად გაჩენილი ხანძრის ვიდეომასალას ავრცელებენ. ინფორმაციის თანახმად, დრონებმა ქარხანაში მდებარე გათხევადებული გაზის საცავს დაარტყეს.
ქარხანაზე შეტევა დაადასტურა თათრეთის რესპუბლიკის ხელმძღვანელმა რუსტამ მინინხანოვმა. როგორც რეგიონის ხელმძღვანელმა „ტელეგრამის“ საკუთარ არხზე დაწერა, თავდასხმას მსხვერპლი და სერიოზული ნგრევა არ მოჰყოლია.