ეროვნული უსაფრთხოების საკითხებში აშშ-ის პრეზიდენტის მრჩეველი ჯეიკ სალივანი აცხადებს, რომ ცოცხალი ძალის დეფიციტი უკრაინის არმიაში მწვავე პრობლემად რჩება და ეს არის ის საკითხი, რომლის გადაჭრაც უკრაინას მოუწევს. ამის შესახებ სალივანმა სააგენტო „ბლუმბერგთან“ ინტერვიუში განაცხადა.
ჟურნალისტმა სალივანს უკრაინაში მობილიზაციის ასაკის 18 წლამდე დაწევის შესაძლებლობის შესახებ ჰკითხა. როგორც სალივანმა აღნიშნა, უკრაინამ უკვე შეამცირა მობილიზაციის ასაკი 27-დან 25 წლამდე.
„ცოცხალი ძალის პრობლემა გამწვავდა გასული წლის განმავლობაში და გაიზარდა საჭიროება იმისა, რომ უკრაინამ სრულად შეძლოს თავისი ბრიგადების და ბატალიონების დაკომპლექტება, რადგანაც ჩვენ მივაწოდეთ დიდი რაოდენობით აუცილებელი საბრძოლო მასალა და სამხედრო აღჭურვილობა“, – განაცხადა სალივანმა.
ეროვნული უსაფრთხოების საკითხებში ბაიდენის მრჩეველმა თქვა, რომ არსებული პრობლემების შესახებ მათ მომავალი ადმინისტრაციის გუნდსაც აცნობეს. ამავე დროს, მან აღნიშნა, რომ მობილიზაციის ასაკის შემცირება არის სუვერენული გადაწყვეტილება, რომელიც მხოლოდ უკრაინამ უნდა მიიღოს.
„ჩვენ მკაფიოდ განვაცხადეთ, მათ შორის საჯაროდ, რომ ცოცხალი ძალა არის მწვავე პრობლემა და ეს არის ის საკითხი, რომლის გადაჭრაც უკრაინას მოუწევს მაშინაც, როდესაც ჩვენ შევიტანთ ჩვენს წვლილს მათთვის საჭირო აღჭურვილობის მიწოდებაში“, – თქვა სალივანმა.