იცით თქვენ, რომ მიხაილ როთი მიდის გერმანული პოლიტიკიდან, მაგრამ რატომღაც ქართველებს გვემშვიდობება. არ ვიცი შეიძლება აპირებს საქართველოში პოლიტიკური საქმიანობის გაგრძელებას, ეს მისი გადასაწყვეტია, თუმცა ჩვენი კანონმდებლობით უცხოეთის მოქალაქეებს არ აქვთ ამ პროცესში ჩართულობის უფლება, – განაცხადა გარემოს დაცვისა და ბუნებრივი რესურსების საპარლამენტო კომიტეტის თავმჯდომარის პირველმა მოადგილემ, უმრავლესობის წევრმა ვლადიმერ ბოჟაძემ გადაცემაში „დღის ქრონიკა“.
„თქვენ გახსოვთ რა განცხადებები გააკეთა შოლცმა, ავსტრალიის პრემიერ-მინისტრმა და სხვებმა, რომ თურმე ილონ მასკის ერთი პოსტი და ერთი განცხადება ეს არის უცხო ქვეყნის შიდა საქმეებში ჩარევა და ა.შ. და როთის ვიზიტები არ არის შიდა საქმეებში ჩარევა. სხვადასხვა ქვეყნის საგარეო საქმეთა მინისტრების, საგარეო კომიტეტის ხელმძღვანელების ჩამოსვლა და ოპოზიციის მიტინგზე მისვლა, ეს არ ყოფილა თურმე არჩევნებში ჩარევა.
იგივე შეიძლება ვთქვათ ევროპარლამენტარების განცხადებებზე, რეზოლუციებზე, მოწოდებებზე და ა.შ. რა თქმა უნდა ასეთ ვიზიტებს ვერანაირი შედეგი ვერ ექნება ამ თვალსაზრისით და კიდევ ერთხელ დადასტურდა, რომ ისინი არიან „ნაციონალური მოძრაობის“ მეგობრები და არა საქართველოს მეგობრები“, – აღნიშნა ვლადიმერ ბოჟაძემ.