რუსეთის პრეზიდენტი ვლადიმერ პუტინი, რომელიც უკრაინასთან ომს აგრძელებს და სამშვიდობო შეთანხმებას არ დებს, საკუთარ ქვეყანას ანადგურებს, – განაცხადა აშშ-ის პრეზიდენტმა დონალდ ტრამპმა.
ჟურნალისტებმა ტრამპს ჰკითხეს, თუ როგორ უყურებს ის რუსეთის ომს უკრაინაში. აშშ-ის პრეზიდენტმა თქვა, რომ „ზელენსკის შეთანხმების მიღწევა სურს“. მან გამოთქვა იმედი, რომ პუტინსაც სურს შეთანხმების მიღწევა, იმიტომ რომ „ის შეთანხმებაზე ხელის არ მოწერით რუსეთს ანადგურებს“.
„ვფიქრობ, რუსეთს დიდი პრობლემები აქვს. შეხედეთ ინფლაციას რუსეთში… ვიმედოვნებდი, რომ მას [პუტინს] სურს შეთანხმების მიღწევა“, – თქვა ტრამპმა.
„შეუძლებელია ის აღფრთოვანებული იყოს იმით, რომ მასთან არც თუ ისე კარგად მიდის საქმეები. მხედველობაში მაქვს ის, რომ ის რაღაცას თავს ართმევს, თუმცა ადამიანების უმეტესობას სჯეროდა, რომ ომი დაახლოებით ერთ კვირაში დასრულდებოდა, ხოლო ახლა ის სამი წელია გრძელდება, ასე არ არის?“, – დასძინა აშშ-ის პრეზიდენტმა.