გერმანიის კანცლერი ოლაფ შოლცი აცხადებს, რომ ევროკავშირის წინააღმდეგ ტარიფების მუქარის ფონზე კონფრონტაციის ნაცვლად, დონალდ ტრამპთან თანამშრომლობის იმედი აქვს.
ჟურნალისტის კითხვაზე, დაემუქრება თუ არა ევროკავშირი ტრამპს საპასუხო ტარიფებით, შოლცმა განაცხადა, რომ ის იმედოვნებს თანამშრომლობას და არა კონფრონტაციას.
„ჩვენი ხელი გაწვდილია, რადგან ტარიფები არავისთვის არის სასარგებლო. აშშ მაინც თუ მიმართავს ასეთ ნაბიჯებს, ევროკომისიას შეუძლია, რამდენიმე საათში მოახდინოს რეაგირება“, – განაცხადა შოლცმა.
გერმანიის კანცლერს ასევე ჰკითხეს, შეუძლია თუ არა ტრამპის მიერ სხვა ქვეყნების წინააღმდეგ დაწესებულ „სადამსჯელო“ ტარიფებს გამოიწვიოს სავაჭრო ომი და შედეგად – გლობალური ეკონომიკური კრიზისი.
„მსოფლიო ეკონომიკას სჭირდება ნაკლები სავაჭრო ბარიერები და არა მეტი. გლობალიზაციამ შექმნა კეთილდღეობის მნიშვნელოვანი დონე მთელ მსოფლიოში”, – განაცხადა შოლცმა.
ოლაფ შოცლმა აღნიშნა, რომ გერმანია თავისი მაღალეფექტური საექსპორტო სექტორით სარგებელს იღებს ამისგან და ეს მომავალშიც უნდა გაგრძელდეს.
„სწორედ ამიტომ ვცდილობ, რომ ჩვენ ევროკავშირში ერთად ვიდგეთ და ნათელი გავხადოთ, რომ ევროკავშირი თავისი 450 მილიონი მცხოვრებით არის ძლიერი და ქმედითუნარიანი“, – განაცხადა გერმანიის კანცლერმა.
ცნობისთვის, აშშ-ის პრეზიდენტი დონალდ ტრამპი უახლოეს მომავალში ევროკავშირიდან იმპორტირებულ საქონელზე ტარიფების დაწესებას გეგმავს. ტრამპი აცხადებს, რომ ევროკავშირი აშშ-ს „ბოროტად იყენებდა“ და ამერიკის სავაჭრო დეფიციტმა ევროკავშირთან ურთიერთობაში 300 მილიარდ დოლარს მიაღწია.