ყაზახეთის პარლამენტში „უცხოური აგენტების შესახებ“ კანონის მიღების ინიციატივით გამოვიდნენ. ინფორმაციას ამის შესახებ ადგილობრივი მედია ავრცელებს. დეპუტატმა, ირინა სმირნოვამ შეშფოთება გამოთქვა ყაზახეთში უცხოური არასამთავრობო ორგანიზაციების საქმიანობის გამო და პარლამენტს შესაბამისი კანონის მიღება შესთავაზა.
დეპუტატი აღნიშნავს, რომ წინა პლენარულ სხდომაზე მისმა პარტიამ „ყაზახეთის სახალხო პარტიამ“ დააყენა ქვეყანაში USAID-ის საქმიანობის საკითხი.
„ჩვენს მოქალაქეებს არ მოსწონთ, რომ ვიღაც საზღვარგარეთიდან თავს გვახვევს უცხო ღირებულებებს, რომლებიც შოკისმომგვრელია ჩვენი საზოგადოებისთვის და რყვნის ჩვენს ახალგაზრდობას. ყაზახებს არ სურთ, იყვნენ სხვისი თამაშების მძევლები“, – განაცხადა სმირნოვამ.
დეპუტატის ინფორმაციით, ყაზახეთში მოქმედებს 200-მდე უცხოური არასამთავრობო ორგანიზაცია, რომელთაგან 70% დაფინანსებას აშშ-დან იღებს.
დეპუტატი მიიჩნევს, რომ დადგა დრო, გადაიხედოს მთელი რიგი არასამთავრობო ორგანიზაციების სტატუსი, რომლებიც წლების განმავლობაში მუშაობენ „ნაცრისფერ“ ზონაში, და „გადაიწეროს თამაშის წესები უცხოელ დონორებთან, რომლებიც პოლიტიკურ ინტერესებს ნიღბავენ „მედიის მხარდაჭერად“, „ადამიანის უფლებების დაცვად“ და „ტოლერანტობის გაზრდად“.