მოქალაქეთა პოლიტიკური გაერთიანებებისა და საქართველოს საკონსტიტუციო სასამართლოს შესახებ კანონებში ცვლილებები შედის. აიკრძალება ყველა ის პარტია, რომელიც დაკავებულია ანტისახელმწიფოებრივი საქმიანობით.
რაც შეეხება საკონსტიტუციო სარჩელს, რომელსაც მმართველი გუნდი მოამზადებს, საუბარია „ნაციონალური მოძრაობისა“ და მისი სატელიტი პარტიების არაკონსტიტუციურად გამოცხადებაზე.
„ქართულ ოცნებაში“ აცხადებენ, რომ ამ სარჩელის მყარი საფუძველი იქნება დროებითი საგამოძიებო კომისიის საბოლოო დასკვნა.
„ეს ინიციატივა იმიტომ არის საჭირო, რომ ფარულად და მანიპულაციებით ვერ შეძლონ ახალი ორგანიზაციების შექმნა ძველმა აქტორებმა, რომლებმაც არაკონსტიტუციური ქმედებით გამოიწვიეს საკუთარი პარტიის არაკონსტიტუციურად ცნობა, პოტენციურად. ამ გადაწყვეტილებას არც აღმასრულებელი, არც საკანონმდებლო ხელისუფლება არ იღებს, იღებს სასამართლო ხელისუფლება. ასე რომ მოემზადონ სასამართლო ხელისუფლებაში თავისი „სიმართლის“ სამტკიცებლად“, – განაცხადა თავდაცვისა და უშიშროების კომიტეტის თავმჯდომარის პირველმა მოადგილემ თენგიზ შარმანაშვილმა.
