„ქართული ოცნების“ ზესტაფონის, ბაღდათის, თერჯოლისა და ტყიბულის დელეგატმა პარლამენტში ზვიად შალამბერიძემ პარლამენტში შექმნილი 2003-2012 წლებში მოქმედი რეჟიმისა და რეჟიმის პოლიტიკური თანამდებობის პირების საქმიანობის შემსწავლელი დროებითი საგამოძიებო კომისიის მუშაობა „დღის ქრონიკაში“ შეაფასა და დასძინა, რომ ეს პროცესი უმნიშვნელოვანესია.
როგორც ზვიად შალამბერიძემ აღნიშნა, საგამოძიებო კომისიამ ბევრ მნიშვნელოვან ფაქტს „ფარდა ახადა“.
„პარლამენტში უმნიშვნელოვანესი პროცესი მიმდინარეობს, რასაც საგამოძიებო კომისია ჰქვია, რომელმაც ძალიან ბევრ მნიშვნელოვან ფაქტორს, რომელიც შეიძლება ჩვენი საზოგადოებისთვის ცნობილი არ იყო, ფარდა ახადა. ყველა მიმართულებით ჩნდებიან ჰორიზონტზე ის პოლიტიკური ლიდერები, რომლებიც პირდაპირ იყვნენ ჩართული ყველა მიმართულებით: როგორც ბიზნესის რეკეტში, ჩამორთმევაში, ხალხის დაპატიმრებაში, ასევე, სამწუხაროდ, ჩართული იყვნენ 2008 წლის ომში.
ოპოზიციიდან ხშირად გვესმის, რომ ეს არის სამხედროების ან იმ გენერლების გასამართლება, რომლებიც ადგილზე იყვნენ მოსული, მაგრამ ცალსახად, ეს იმ პოლიტიკური ლიდერების და პოლიტიკოსების მიმართ ნაწარმოები საგამოძიებო მოქმედებებია, რომლებიც იყვნენ 2003-2012 წლებში სახელმწიფოს სათავეში. ჩვენ ახლა გავახანგრძლივეთ და 2012 წლის შემდგომაც იქნება გამოძიებული მათი მოქმედებები და ვფიქრობ, კიდევ ბევრი გვარი იქნება, რომელსაც კომისიაზე დაიბარებენ. თუ ისინი გადაწყვეტენ, რომ საგამოძიებო კომისიასთან არ ითანამშრომლონ, მათ წინააღმდეგაც კანონი იქნება ძალიან მკაცრი. ყველამ უნდა იცოდეს, რომ კანონი არის უზენაესი და ყველა ადამიანი კანონს უნდა დაემორჩილოს“, – აღნიშნა ზვიად შალამბერიძემ.
პარლამენტში შექმნილი, 2003-2012 წლებში მოქმედი რეჟიმისა და რეჟიმის პოლიტიკური თანამდებობის პირების საქმიანობის შემსწავლელი დროებითი საგამოძიებო კომისია მუშაობას განაგრძობს.
კომისია მანდატს აფართოებს და „ნაციონალური მოძრაობის“ მიერ 2012 წლიდან ჩადენილ ანტისახელმწიფოებრივ ქმედებებსაც შეისწავლის. დეპუტატები ხუთი მიმართულებით მუშაობენ, მათ შორისაა 2008 წლის ომი, ომისწინა პერიოდი და ბიზნესის რეკეტი.