დროებითი საგამოძიებო კომისია პარლამენტში მუშაობას განაგრძობს. კომისია დღეს „ნაციონალური მოძრაობის“ მმართველობის პერიოდში საკუთრების უფლების დარღვევისა და არაადამიანური მოპყრობის ფაქტებს განიხილავს.
სხდომაზე გორის ბაზრობის წართმევის ფაქტზე ჯემალ წიკლაური ისაუბრებს. ციხეში არაადამიანურ მოპყრობაზე სასაუბროდ წინა ხელისუფლების დროს არასრულწლოვანი მსჯავრდადებული გიორგი ზერეკიძე იქნება მიწვეული.
დროებითი საგამოძიებო კომისია 2003-2012 წლებში მოქმედი რეჟიმისა და რეჟიმის პოლიტიკური თანამდებობის პირების საქმიანობას შეისწავლის, დასკვნა კი პროკურატურას გადაეგზავნება.
ცნობისთვის, დღეს თბილისის საქალაქო სასამართლოში დროებითი საგამოძიებო კომისიის კანონიერი მოთხოვნის შეუსრულებლობის ფაქტზე მამუკა ხაზარაძის სასამართლო პროცესი გაიმართება, პროკურატურამ ხაზარაძეს ბრალი გუშინ წარუდგინა და აღკვეთის ღონისძიების გამოყენებაზე სასამართლოს უკვე მიმართა.