ბუნებრივია, რომ რადიკალურ ოპოზიციას ძალიან ეშინია, სამართლიანადაც ეშინია თვითმმართველობის არჩევნების, სრული ბანკროტები არიან, საზოგადოების თუნდაც მცირე ნაწილის არანაირი მხარდაჭერა არ აქვთ, – ამის შესახებ პარლამენტის ადამიანის უფლებათა დაცვისა და სამოქალაქო ინტეგრაციის კომიტეტის თავმჯდომარემ, რატი იონათამიშვილმა განაცხადა.
მისი თქმით, ოპოზიციური პარტიების დაპირისპირებაც კი კომიკურია.
„„ნაციონალური მოძრაობა“ და მისი ანასხლეტები კრიმინალების და დამნაშავეთა პარტიაა, რომლებიც ქვეყანას მტრობდნენ მაშინაც, როდესაც ხელისუფლებაში იყვნენ და მტრობას განაგრძობდნენ, როდესაც ოპოზიციაში იყვნენ. უღალატეს ყველას, ვისაც კი შეიძლებოდა, მათ შორის საკუთარ მხარდამჭერებსაც კი. ვფიქრობ, სამართლიანია იმის გააზრება, რომ მსგავსი პოლიტიკური დაჯგუფებები საერთოდ არ უნდა იყვნენ პოლიტიკაში და პოლიტიკური ველი გაიწმინდოს. ეს მნიშვნელოვნად გააძლიერებს და ხელს შეუწყობს ქვეყანაში პოლიტიკური სივრცის გაჯანსაღებას და ისეთი ოპოზიციური პარტიების გაჩენას, რომლებიც იქნებიან ქვეყნის სხვადასხვა ჯგუფის სამსახურში და არა დავალებათა გამცემების, გარე პატრონების, ვის დავალებებსაც ამ ადამიანებმა ყველა და ყველაფერი გადააყოლეს“, – განაცხადა რატი იონათამიშვილმა.
მისი თქმით, ამ ადამიანებს საკუთარი აზრი არ გააჩნიათ.
„მათი ერთადერთი ამოცანაა გარე პატრონების დავალებების შესრულება. ეს პროცესები – ყველაფერი ყალბია, ვინაიდან როგორც კი დავალებას მიიღებენ, ამ დავალების ქვეშ იმოქმედებენ. ყოველ ჯერზე ასე ხდებოდა. პრინციპები და საკუთარი პოზიციები არ გააჩნიათ, მხოლოდ ამ დავალებების შესრულების ამარა არიან, მაგრამ იქაც ხელმოცარულები და წაგებულების იმიჯით არიან“, – განაცხადა რატი იონათამიშვილმა.