კიდევ ერთხელ გამოჩნდა „ნაციონალური მოძრაობის“ რეალური სახე, – განაცხადა გარემოს დაცვისა და ბუნებრივი რესურსების საპარლამენტო კომიტეტის თავმჯდომარის პირველმა მოადგილემ, უმრავლესობის წევრმა ვლადიმერ ბოჟაძემ პარლამენტის დროებითი საგამოძიებო კომისიის სხდომაზე მოსმენილი ინფორმაციის შეფასებისას.
„ჩვენ კიდევ ორი ძალიან მნიშვნელოვანი საკითხი მოვისმინეთ კომისიაზე. ეს იყო გიორგი ზერეკიძის ცნობილი საქმე და გორის ბაზრის საქმე. აქაც კიდევ ერთხელ გამოჩნდა „ნაციონალური მოძრაობის“ რეალური სახე, რომ „ნაციონალური მოძრაობა“ სისტემურად და სისტემატურად აწამებდა ადამიანებს პენიტენციურ სისტემაში და რაც ყველაზე მთავარია, ასევე ართმევდნენ და არეკეტებდნენ ბიზნესს ოჯახის წევრების დაშინებით და მუქარით. ეს არის რეალობა, რომელშიც გვაცხოვრებდა „ნაციონალური მოძრაობა“ 2012 წლამდე”, – განაცხადა ვლადიმერ ბოჟაძემ.
2003–2012 წლებში მოქმედი რეჟიმის, ამ რეჟიმის პოლიტიკური თანამდებობის პირებისა და პოლიტიკურ პარტიებში გაერთიანებული მოქმედი და ყოფილი თანამდებობის პირების 2003 წლიდან დღემდე საქმიანობის შემსწავლელმა პარლამენტის დროებითმა საგამოძიებო კომისიამ გუშინ საკუთრების უფლების დარღვევისა და არაადამიანური მოპყრობის ფაქტები განიხილა. სხდომაზე მოუსმინეს წინა ხელისუფლების დროს დაკავებულ არასრულწლოვანს გიორგი ზერეკიძეს, გორის ბაზრობის წართმევის საკითხზე ბაზრის ყოფილი მფლობელს ჯემალ წიკლაურს.
დღეს კი პარლამენტის საგამოძიებო კომისიის სხდომაზე რამაზ ახვლედიანს, გივი თარგამაძესა და კახა დაბრუნდაშვილს მოუსმენენ, სხდომას პენიტენციური დაწესებულებიდან მსჯავრდებულიც ჩაერთვება.