თბილისის მერის განცხადებით, საქართველო არის დამოუკიდებელი ქვეყანა და თვითონ გადაწყვეტს, ვისთან ჰქონდეს ურთიერთობები.
ამის შესახებ კახა კალაძემ ჟურნალისტებს ჰელსინკის კომისიის წევრების მიერ გამოქვეყნებული განცხადების პასუხად განუცხადა, რომელშიც გამოთქმულია შეშფოთება „ქართული ოცნების“ გადაწყვეტილების შესახებ, ანაკლიის ღრმაწყლოვან პორტის კონტროლი „გადასცეს ჩინეთის კომუნისტურის პარტიის მიერ მხარდაჭერილ, აშშ-ის მიერ დასანქცირებულ კონგლომერატს“.
„საქართველო არის დამოუკიდებელი ქვეყანა, სუვერენული სახელმწიფო და თვითონ გადაწყვეტს, ვისთან ჰქონდეს ურთიერთობები, რა ტიპის ურთიერთობები ჰქონდეს და რა სავაჭრო ურთიერთობები. ეს არის არის ჰელსინკის კომისიის საქმე“, – განაცხადა კახა კალაძემ.
რაც შეეხება აშშ-თან ურთიერთობების დალაგებას, თბილისის მერი ამბობს, რომ ხელისუფლებისთვის მთავარი არის ქართველი ხალხი.
„ჩვენთვის ყველაზე მთავარი არის ქართველი ხალხი, ჩვენი სამშობლო და ჩვენი ქვეყნის ინტერესები. მერე არის ყველაფერი დანარჩენი, სხვა ქვეყნებთან ურთიერთობები. რა არის ამაში გაუგებარი. მარტივად ვაკვირდებით პროცესებს, ვართ მოლოდინის რეჟიმში. გულწრფელად ვიტყვი: იმ პოლიტიკის გამო, იმ მხილების გამო, რომელიც „ქართულმა ოცნებამ“, ამ პატარა ქვეყანამ დაიწყო და მთელ მსოფლიოს დაანახა, რა არის „დიფ სთეითი“, სამი წლის წინ, როდესაც ჩვენ ამაზე ვსაუბრობდით, თქვენ მაშინ ქილიკობდით, არ გჯეროდათ. როდესაც ტრამპი გახდა პრეზიდენტი, პირდაპირ თქვა, რომ მისი მთავარი ამოცანაა, დაამარცხოს „დიფ სთეითი“. ჩვენ ვგულშემატკივრობთ ამაში, რომ მან მოახერხოს „დიფ სთეითის“ დამარცხება, რაც არ იქნება მარტივი“, – აღნიშნა კახა კალაძემ.