არ მეგონა, თუ ამას ოდესმე ვიტყოდი, მაგრამ ვეთანხმები ქალბატონ ანა წითლიძეს, – განაცხადა იურიდიულ საკითხთა საპარლამენტო კომიტეტის თავმჯდომარემ, არჩილ გორდულაძემ.
იგი „ნაციონალური მოძრაობის“ წევრის, ანა წითლიძის მიერ პარტია „გირჩის“ „იუთუბ“ არხზე, გადაცემაში გაკეთებულ განცხადებას გამოეხმაურა, რომელიც პარლამენტის არჩევნების შედეგებს ეხებოდა.
„არ მეგონა, თუ ამას ოდესმე ვიტყოდი, მაგრამ ვეთანხმები ქალბატონ ანა წითლიძეს. მართალია ქალბატონი ანა, როდესაც ამბობს, რომ კოლექტიურმა „ნაცმოძრაობამ“ ვერ გაიაზრა, თუ რა შედეგი მოიტანა ბატონ ბიძინა ივანიშვილის მიერ პარტია „ქართული ოცნების“ დაფუძნებამ, „ქართული ოცნების“ მიერ გადადგმულმა ნაბიჯებმა და ქართველმა ხალხმა. მათ ვერ გაიაზრეს, რომ უკვე 10 არჩევნებში დამარცხდნენ და ვერ გაიაზრეს ამ დამარცხების მიზეზები.
სანამ ეს ადამიანები არ დაანებებენ თავს ჩვენი ქვეყნის ჩამონგრევის მცდელობებს, მანამდე იქნებიან დამარცხებულები. ამიტომ, კარგად გაიაზრონ, როგორ არ უნდა შეასრულონ მონურად თავიანთი ბატონების დავალებები, მაგრამ სამწუხაროდ, ჯაშუშის ბედი ასეთია“, – განაცხადა გორდულაძემ.