საქართველოს სახელმწიფო უსაფრთხოების სამსახური გააგრძელებს კორუფციის წინააღმდეგ აქტიურ მუშაობასა და სათანადო ღონისძიებების განხორციელებას, – განაცხადა სახელმწიფო უსაფრთხოების სამსახურის უფროსობის კანდიდატმა ანრი ოხანაშვილმა პარლამენტის თავდაცვისა და უშიშროების კომიტეტის სხდომაზე.
როგორც ანრი ოხანაშვილმა აღნიშნა, კორუფციასთან ბრძოლის თვალსაზრისით აღსანიშნავია, რომ „კორუფციის აღქმის ინდექსის“ 2025 წლის მონაცემების მიხედვით, საქართველო კარგი შეფასების მქონე ქვეყნების რიგშია.
„საქართველოს სახელმწიფო უსაფრთხოების სამსახურის საქმიანობის ერთ-ერთი მნიშვნელოვანი მიმართულებაა კორუფციის წინააღმდეგ ბრძოლა და სამოხელეო დანაშაულებში შესაძლო მონაწილე შესაბამის მოხელეთა გამოვლენა. ამ მხრივ სამსახური რეაგირებს სამსახურის ანტიკორუფციული სააგენტოს მიერ მიღებულ შეტყობინებებსა და სხვა სათანადო ინფორმაციაზე კორუფციული დანაშაულების შესაძლო ჩადენის ფაქტებთან დაკავშირებით. სამსახური გააგრძელებს ამ მიმართულებით აქტიურ მუშაობასა და სათანადო ღონისძიებების განხორციელებას“, – განაცხადა ანრი ოხანაშვილმა.