ვერ ვიტყვით, რომ მთლიანი ოპოზიცია გადაწყვეტს და არჩევნებში მიიღებს მონაწილეობას ან ყველა უარს იტყვის, საქმე დესტრუქციის მომწყობ ადამიანებთან გვაქვს, რომლებიც საკუთარი ქვეყნის წინააღმდეგ გამოდიან, – ამის შესახებ პარლამენტის პირველმა ვიცე-სპიკერმა, გია ვოლსკიმ განაცხადა.
მისი თქმით, ბოლო პერიოდში საზოგადოებამ არაერთი კონსპირაცია იხილა, როდესაც ოპოზიციაში, თითქოს აზრთა სხვადასხვაობა იყო, შემდეგ კი თანხმდებოდნენ საქართველოში დესტაბილიზაციისა და რევოლუციური სცენარის განვითარებაზე.
„ბოლო პერიოდში არაერთი კონსპირაცია ვიხილეთ, როცა ოპოზიციაში, ვითომ აზრთა სხვადასხვაობა იყო და შემდეგ თანხმდებოდნენ საქართველოში დესტაბილიზაციისა და რევოლუციური სცენარის განვითარებაზე. მათი ეს მიზანი და ლოზუნგი შეუცვლელია, შეიძლება, ტაქტიკაში იყოს გარკვეული განსხვავება და ამაზე მიდიოდეს კამათი. შეიძლება, მათ შორის კამათი მოჩვენებითიც არის, რადგან ჯერ მკაფიო ინსტრუქცია არ აქვთ მიღებული. ვერ ვიტყვით, რომ მთლიანი ოპოზიცია გადაწყვეტს და არჩევნებში მიიღებს მონაწილეობას ან ყველა უარს იტყვის. ფაქტია, რომ ყველა შემთხვევაში, საქმე დესტრუქციის მომწყობ ადამიანებთან გვაქვს, რომლებიც საკუთარი ქვეყნის წინააღმდეგ გამოდიან. ეს შეთქმულთა ჯგუფი უფრო არის, ვიდრე პოლიტიკური გაერთიანება“, – განაცხადა გია ვოლსკიმ.