„სტრატეგია აღმაშენებლის“ ლიდერს, გიორგი ვაშაძეს საგამოძიებო კომისიაზე გამოუცხადებლობის საქმეზე აღკვეთის ღონისძიების სახით 50 000-ლარიანი გირაო შეეფარდა.
აღნიშნული გადაწყვეტილება თბილისის საქალაქო სასამართლოს მოსამართლემ, მზია გარშაულიშვილმა მიიღო. ამ გადაწყვეტილებით სასამართლომ პროკურატურის შუამდგომლობა დააკმაყოფილა. დაცვის მხარე გიორგი ვაშაძის აღკვეთის ღონისძიების გარეშე დატოვებას ითხოვდა.
გიორგი ვაშაძეს გირაოს გადახდის ვადად 30 დღე განესაზღვრა.
როგორც გიორგი ვაშაძემ ჟურნალისტებს განუცხადა, თანაგუნდელებთან კონსულტაციის შედეგად გადაწყვეტს, გადაიხდის თუ არა დაკისრებულ გირაოს.
„ფორმალურადაც კი, თუნდაც ამ კომისიას რომ ეძახიან, კონსტიტუციაში წერია, რომ ნახევარი მაინც უნდა იყოს ოპოზიციის წარმომადგენელი. ვის ხედავთ იქ ოპოზიციის წარმომადგენელს? ეგეთი ხომ არ არსებობს? იქ არავინ არ არის, შესაბამისად, კონსტიტუციიდან გამომდინარე, ეს რაღაც წარმონაქმნი არალეგიტიმურია არა მხოლოდ იმიტომ, რომ არალეგიტიმური პარლამენტის მიერ არის შექმნილი, არამედ იმიტომ, რომ ანტიკონსტიტუციური, გაუგებარი თავყრილობაა ადამიანებისა, რომლებსაც აქვთ აკვიატებული აზრი, რომ თვითონ არიან კომისია და თვითონ შეუძლიათ ყველაფერი. მე კი მათ ვეუბნები, ძალიან ცოტა დაგრჩათ, სამართალი იზეიმებს და ჩვენ აუცილებლად გავიმარჯვებთ“, – განაცხადა გიორგი ვაშაძემ.
წინასასამართლო სხდომა 27 მაისს, 12:00 საათისთვის ჩაინიშნა.
გიორგი ვაშაძე პარლამენტის დროებით საგამოძიებო კომისიაზე 15 აპრილს დაიბარეს, თუმცა ვაშაძე სხდომაზე არ გამოცხადდა. გიორგი ვაშაძეს სისხლის სამართლის კოდექსის 349-ე მუხლით წაუყენეს ბრალი, რაც გულისხმობს „საქართველოს პარლამენტის დროებითი საგამოძიებო კომისიის მოთხოვნის შეუსრულებლობას“. აღნიშნული ისჯება ჯარიმით ან თავისუფლების აღკვეთით ვადით ერთ წლამდე, თანამდებობის დაკავების ან საქმიანობის უფლების ჩამორთმევით ვადით სამ წლამდე.